كود -وكالات//
نجمة التنس اليابانية نعومي أوساكا كتفرض راسها ماشي غير فتيرانات، ولكن حتى فعالم الموضة، وهاد الشي بان من جديد فبطولة رولان غاروس فباريس.
قبل الماتش ديالها فالدور الثاني، دخلات أوساكا للملعب لابسة جاكيطة بومبر ذهبية لامعة فوق كسوة دهبية مزينة بتوب عاجي تابعها من اللور فطلة خلطات بين الرياضة والأزياء الراقية ،ومن بعد حيدات الجاكيطة قبل ما يبدا الماتش ضد كرواتيا دونا فيكيتش.
أوساكا قالت من بعد الرباح: “كنبغي نخلي الناس ديما متشوقين، حيث كاين واحد الجمهور ولى كيتبع الأزياء ديالي فالملاعب، وكنستمتع ملي كنخليهم يتسناو الجديد” ،وقدرات أوساكا من الرباح بجوج مجموعات بلا رد (7-6 و6-4)، وتأهلات للدور الثالث فرولان غاروس لأول مرة منذ 2019.
فالماتش اللول ديالها فالبطولة، دخلات أوساكا بصاية كحلة كلاص وصدرية مطرزة بلا كمايم، قبل ما تبين اللبسة الذهبية ديالها اللي قالت باللي كتفكرها ببرج إيفل ملي كيتشعل فالليل.
لكن هاد الإطلالات ما عجباتش الجميع. اللاعبة الألمانية لورا سيغموند اعتبرت أن الطريقة اللي دخلات بها أوساكا للملعب كتبيّن باللي الأسماء الكبيرة كتستافد من معاملة مختلفة.
وقالت سيغموند إنها ما عندها حتى مشكل مع الملابس، ولكن شافت باللي الوقت اللي خداتو أوساكا باش توجد للمباراة كان طويل شوية، فحين اللاعبات الأقل شهرة كيتعرضو لضغط باش يوجدو دغيا وما يتعرضوش لعقوبات بسبب الوقت.
وضافات: “أنا جيت لهنا باش نلعب التنس، ماشي باش ندير عرض أزياء. إلا بغاو الآخرين يديرو عروض أزياء، هادي حرية ديالهم، وما عنديش مشكل مع هاد الشي.”
وخا الانتقادات، كيبان أن أوساكا مستمرة فالخلط بين الرياضة والموضة، وكتحول كل دخول للملعب إلى حدث كيجلب اهتمام الجماهير ووسائل الإعلام.