كود سبور//
قرر البارصا الصبليوني يخلد إسم الاسطورة الأرجنتيني ليونيل ميسي اللي كيتعتبر واحد من افضل نجوم كرة القدم اللي دازو فالعالم، ويبني له تمثال فالتيران ديالو.
وذكرت تقارير إعلامية صبليونية نقلا عن رئيس البارصا خوان لابورتا أن الفريق ديال كتالونيا ناوي يبني تمثال لميسي فالكامب نو، التيران ديال البارصا حدا تمثال الاسطورة الهولندي يوهان كرويف وأن الخدمة بدات فبناء التمثال.
وكيتعتابر الأرجنتيني ليونيل ميسي اللي كيلعب دابا مع باريس سان جيرمان الفرنسي واحد من أساطير كرة القدم فالعالم ماشي فقط فالبارصا، حيث حطم عدد كبير من الأرقام فالكرة وحقق إنجازات كبيرة خصوصا مع الفريق السابق ديالو البارصا، وباقي له فقط كأس العالم اللي ماربحش فالكاريير ديالو مع العلم انه قرر يعتزل اللعب مع منتخب الأرجنتيني من بعد المشاركة فكأس العالم المقبلة فقطر.
للإشارة فالبارصا كيخطط وحسب تقارير صبليونية لإعادة ليونيل ميسي للفريق فصيف 2023، من بعدما يسالي العقد ديالو مع باريس سان جيرمان الفرنسي والمسؤولين الماليين فالبارصا كايتسناو غير الإشارة ديال إدارة النادي باش ينطلقو الخدمتهم ويرجعو ميسي.