گود سبور//

غادي ترجع البطولة الاحترافية الويكاند الجاي، بعدما توقفت السيمانا اللي فاتت حيث تلعبو ماتشات كاس العرش.

العصبة الوطنية لكرة القدم الاحترافية، برمجت الدورة 21 من البطولة، بين الجمعة 22 والأحد 24 ماي، ومن الماتشات القاصحين فيها، كاين ماتش المغرب الفاسي المتصدر ضد اتحاد طنجة يوم الجمعة 22 ماي مع 7 العشية فتيران فاس الكبير، وماتش الوداد الرياضي ضد حسنية أكادير يوم السبت 23 ماي مع 7 العشية فستاد دونور، وماتش الدشيرة ضد الرجاء الرياضي يوم الاحد 24 ماي مع 4 العصر فتيران اكادير الكبير، وملي غادي تسالي الدورة 21 عادي تتوقف البطولة بسبب عطلة العيد الكبير.

اما ديربي الرباط بين الفتح الرياضي والجيش الملكي تأجل حتى للسبت 30 ماي فتيران مولاي الحسن فالرباط، والتأجيل الماتش جا حيث ليفار لاعبين فينال دوري ابطال افريقيا.

وغادي ترجع البطولة بإجراء الدورة 22، اللي غادي تلعب بين فاتح و 4 يونيو، ومن اهم الماتشات ديالها مباراة اولمبيك اسفي اللي لاعبين على الطيوح والمغرب الفاسي اللي لاعبين على المركز الاول، يوم الاثنين 1 يونيو مع 7 العشية فتيران المسيرة الخضرا فاسفي، الوداد الرياضي غادي يخرجو عند اتحاد طنجة يوم الاربعاء 3 يونيو مع 7 العشية فتيران طنجة الكبير، والرجاء الرياضي مدخلين نهضة بركان نفس اليوم مع  9 الليل فستاد دونور، وليفار مدخلين الدفاع الجديدي يوم الخميس 4 يونيو مع 9 الليل فالتيران الاولمبي.

إقرأ الخبر من مصدره