كود سبور//
خسرو الرجاء الرياضي ماتش الكلاسيكو ضد الجيش الملكي، اليوم الثلاثاء فتيران العربي الزاولي برسم الجولة الأولى من دور مجموعات دوري أبطال أفريقيا.
وسالا الماتش بين الرجاء الرياضي والجيش الملكي بنتيجة 2 لزيزو لمصلحة الفريق العسكري، وهو الهدف اللي ماركاه أحمد حمودان فالشوط الأول من الماتش، وفالشوط الثاني ضغطو الرجا باش يماركيو التعادل وزگل لهم صابر بوگرين بينالتي، وبقات النتيجة كما هي حتى الدقيقة الأخيرة فين زادو ليفار الهدف الثاني عن طريق آيت أورخان.
نتيجة هذا الماتش منحت 3 نقاط لفريق الجيش الملكي، واللي كايتصدر دابا الگروب الثاني برصيد 3 نقاط، ومن وراه كل من ماميلودي صن داونز الجنوب إفريقي ومانيما الگونگولي بنقطة لكل واحد منهم بعدما تعادلو اليوم، عاد كايجيو الرجا فالمركز الأخير برصيد زيرو نقطة.
للإشارة فالرجاء الرياضي حيدو خريطة المغرب من التوني ديالهم فالماتش ضد ليفار ودارو بلاصتها العلم المغربي، واللاعب الجزائري يسري بوزوق كان احتياطي ودخل حتى الشوط الثاني، وهذا الشي بعد البوليميك اللي كان صباح اليوم واش غايلعب او لا ما غايلعبش بعد المعلومات اللي كانت راجت بأن السلطات الجزائرية هددوه باش ما يلعبش بتوني الرجا اللي فيه خريطة المغرب، مع العلم أن عادل هالا رئيس الرجا وضح لجورنال “گود” صباح اليوم الثلاثاء أن اللاعب غايلعب الماتش، والفريق غايلعب بتوني فيه العلم المغربي ماشي الخريطة ديال المغرب.