كود سبور//
عبر الناخب الوطني وليد الركراكي عن رضاه على لاعبين المنتخب الوطني المغربي، بعد المستوى اللي قدموه امام منتخب الگابون، فالگابون البارح الجمعة ضمن الجولة 5 من اقصائيات كاس افريقيا 2025، وأكد فنفس الوقت أنه مازال الخدمة ومازال عام ديال الطرافاي باش يوجدو لكوب دافريك.
وقال وليد الركراكي فتصريح له بعدما ربح المنتخب المغربي الگابون بنتيجة 5 لواحد، وقال: “حنا راضيين، كانبارك للاعبين ديالي، حيث ماشي ساهل مع الاول ديال الماتش يتماركا علينا هدف، ولكن تفاعلنا مع هذا الشي بحال المنتخبات الكبيرة، وتعادلنا بالزربة وتقلبنا على الهدف الثاني والثالث”.
وزاد وضح الركراكي: “الكابون خرجو يضغطو علينا ملي تماركاو عليهم 3 أهداف، وخلاو لنا المساحات وهذا الشي استغلناه بفضل اللاعبين ديالنا الميزانين واللي معول عليهم فالمستقبل”.
وأكد وليد الركراكي: “عالجنا بزاف ديال الحوايج بالمقارنة مع ماتش الذهاب، ولكن مازال تابعنا الخدمة، وهذا ماتش مزيان لنا حيث خارج المغرب وكان خصنا نجربو السيناريوهات وكيفاش التعامل معها وواش واجدين لها وحنا فريق بحال العائلة، مازال ما درنا والو وتابعنا عام ديال الخدمة وباقي موصلناش لداكشي اللي بغينا”.