كود سبور//
عبر الدولي المغربي عبد الصمد الزلزولي لاعب ريال بتيس واللاعب السابق ديال البارصا، على الفرحة ديالو حيث نجم ريال مدريد براهيم دياز اختار يلعب للمنتخب المغربي، واكد انه اضافة للأسود، وكشف انه حاول يقنع لامين يامال ملي كان كيلعب معه فالبارصا باش يختار المغرب ولكن يامال ما اقتنعش.
وخلال حوار دايرو عبد الصمد الزلزولي مع جريدة as الاسبانية، هضر على براهيم دياز، وقال: “فالحقيقة كنت هضرت معه فماتش ريال بتيس مع ريال مدريد باش يجي يلعب معنا فالمغرب، وكان قاليا انه حسم فالقرار ديالو، وانا مغربي وبالنسبة ليا براهيم دار احسن قرار، هو لاعب واعر ونبغي يلعب معيا شي واحد واعر بحالو فالفريق”.
وبخصوص لامين يامال اللي اختار يلعب مع اسبانيا، كشف الزلزولي وقال: “دويت معه، ولكن ما اقتنعش، كنت مازال فالبارصا قبل ما يبدا الموسم وحاولت معه باش يختار المغرب، ولكن ما بغاش وخاصنا نحتارمو القرار ديالو وهو لاعب واعر”.
