كود سبور//
عبر عصام الشرعي مدرب المنتخب الوطني المغربي الأولمبي على الفرحة ديالو بالفوز على غانا مساء الثلاثاء فتيران مولاي عبد الله بالرباط، برسم الجولة الثانية من كأس إفريقيا لأقل من 23 عام، والتأهل إلى نصف نهائي البطولة الافريقية.
وتحدث عصام الشرعي فالندوة الصحافية بعد فوز المغرب على غانا بنتيجة 5 لواحد وقال: “فرحان باللاعبين حيث يستاهلو الرباح على النيفو اللي دارو وما عاودوش الغلط د الماتش اللي فات مع غينيا، وحنا عارفين بلي عندنا لاعبين قادرين يماركيو، وراه كنا قادرين نربحو يكثر من 5، وكنشكر الجماهير اللي جات شجعتنا وكنتمنى يبقاو مساندينا”.
وكمل مدرب المنتخب المغربي الأولمبي وقال: “غانا منتخب قوي وماشي حيث خسرو معنا بخمسة راه ضعاف، وكنا قادرين نربحو بستة وسبعة، ولكن كيمشى لنا التركيز مرة مرة، واللاعبين مازالين صغار وكيتعلمو وخاصنا نركزو على الحاجات الإيجابية وكنبارك لهم الرباح، وحنا كاملين واحد ملي نربحو كنربحو كاملين وملي كنخسرو كنخسرو كاملين، والماتش الجاي ضد الكونكو غندخلو نربحوه حيث خاص تكون عندنا عقلية الرباح”.