كود سبور//
كشف كمال حسينة رئيس اتحاد العاصمة الجزائري ان الفريق ديالو تقدم بطلب للاتحاد الافريقي باش يتأجل فينال كاس الكونفدرالية الأفريقية بين نهضة بركان والزمالك المصري، حتى من بعد حكم المحكمة الرياضية الدولية اللي لجأ لها الفريق الجزائري حيث الكاف اعتبرو خاسر لالي وروتور الدومي فينال مع نهضة بركان 3 لزيرو فـ3 لزيرو، بسبب حجز السلطات الجزائرية تونيات الفريق المغربي حيث فيهم خريطة المغرب فلالي بالجزائر وحيث انسحب الفريق الجزائري فالروتور فبركان بسبب خريطة المغرب اللي فتوني نهضة بركان، وهذا الشي فيه خرق لقوانين الكاف من جانب الفريق الجزائري.
والغريب والمثير للاستغراب واللي صغر بزاف من اتحاد العاصمة وقزم الحجم ديالو، هو أنهم طلبو تعويض فمصاريف تأمين وتنظيم ماتش لالي اللي كان فتيرانهم ومصاريف الديبلاصمون للمغرب فماتش الروتور وفلوس الطيارة اللي كراو باش جاو لمدينة وجدة، وقال رئيس اتحاد العاصمة الجزائري كمال حسنية فتصريح لوسائل إعلام جزائرية: “طلبنا تأجيل الفينال، وطلبنا يتعاود الدومي فينال والخسائر اللي درناهم يرجعوهم لنا حيث خسرنا فالأمور التنظيمية ديال ماتش الالي اللي كانت فيه 60 ألف متفرج، والطيارة اللي مشينا فيها لبركان طلبنا تعويض گاع هادشي”.
هذا الشي غايزيد يخلي جمهور الكورة فالجزائر يحقد على سلطات بلادو والكابرانات اللي تسببو فإقصاء الفريق الجزائري من دومي فينال كاس الكونفدرالية، وقزمو بزاف من حجم فريق كبير فالجزائر وعندو تاريخ بحال اتحاد العاصمة اللي ولا يتشكا بسبب مصاريف الطيارة اللي كراها باش يديبلاصا، مع العلم ان اتحاد العاصمة والاتحاد الجزائري لكرة القدم والاندية والمنتخبات الجزائرية مهددة بعقوبات فاضحة بسبب هاد القضية.
