كود سبور//
انهارت لاعبة المنتخب المغربي نهيلة إيلودة النقاش بالبكاء بعد نهاية ماتش المنتخب المغربي وفرنسا الإقصاء من ثمن نهائي كأس العالم للسيدات، ولكن أكدت أن اللاعبات المغربيات كانو حاملين قضية إنسانية واجتماعية وهما يتقاتلو فتيرانات أستراليا، بالإضافة إلى تشريفهم المغرب والمغاربة.
اللاعبات المغربيات كيشوفو أن المشاركة ديالهم فالمونديال كيشوفوها بمثابة انتصار للمرأة المغربية فمجتمع مازال كيشوفو فيه بزاف ديال الناس أن البنت حشومة تلعب كرة بحالها بحال الولد، واخا المرأة المغربية بينت فالعديد من المحطات أنها كيفها كيف الرجل وتفوقت عليه كاع فشي مجالات.
نهيلة إيلودة النقاش قالت وهي منهارة بمنطقة التصريحات فتيران أديلايد بعد ماتش المغرب وفرنسا، بتأثر وهي كتبكي ودموعها على خدها: “حنا مفتاخرين بالباركور اللي درنا فالمونديال كنتمنى هذا الشي اللي درنا يحفز اللاعبات الصغار المغربيات وهذا الشي يساهم فتطوير الكرة النسوية المغربية ويخلي المراة المغربية تزيد تتحرر وتقتحم عالم كرة القدم، وتزيد تنخرط فالرياضية. وكنتمى نكون مصدر فخر للمغاربة بالمغرب راه جاو المشجعين المغاربة للتيران والشعب المغربي كان ديما مساندنا وهذا الشي اللي مخلينا باغيين نديرو ما احسن”.