گود سبور//
عرف المنتخب الوطني المغربي الخصوم ديالو كاملين فـ كاس العرب 2025، اللي غادي تبدا فـ قطر يوم 1 ديسمبر 2025.
المنتخب الوطني المغربي كانت طيحاتو القرعة فـ الگروب 2 من كاس العرب، مع منتخب السعودية، وتسناو المنتخبين بجوج اليوم الأربعاء باش عرفو الجوج منتخبات لاخيرن اللي معهم فـ الگروب، وهما سلطنة عمان وجزر القمر.
وقدرو سلطنة عمان يتأهلو لكاس العرب بعدما ربحو فـ البراج منتخب الصومال بضربات الترجيح بنتيجة 4-1 بعدما سالا الماتش بالتعادل السلبي زيرو لزيرو، وتأهلو جزر القمر بعدما ربحو فـ البراج منتخب اليمن بضربات الترجيح بنتيجة 4-2، بعدما سالا الماتش بنتيجة التعادل الإيجابي 4-4.
وغايلعب المنتخب الوطني المغربي اول ماتش فـ كاس العرب يوم 2 دجنبر الجاي ضد جزر القمر ضمن الجولة الأولى من دور المجموعات، والجولة الثانية ضد منتخب سلطنة عمان يوم 5 دجنبر، والجولة الثالثة يوم 8 دجنبر ضد منتخب السعودية اللي لاعبين بالمنتخب الاول.