كود سبور//
تقهرت عائلة أسطورة كرة القدم المغربية أحمد فرس، من كثرة الاشاعات اللي كتخرج عليه كل مرة، وكيدعيو المروجين لها أنه مات.
أحمد فرس النجم السابق للمنتخب الوطني المغربي وشباب المحمدية خلال مرحلة السبعينيات، خرت بنتو تتشكى من قوة الاشاعات اللي كتروج عليه، ونشرت تدوينة على فيسبوك قالت فيها: “عفاكم باركة من الاشاعات على احمد فرس، راه الله يحفظو ويطول فعمرو بصحتو الحمد لله، حشومك عليكم”.
وصبح أحمد فرس من بين أكثر الاشخاص اللي كتروج عليهم إشاعة الوفاة مؤخرا المغرب، وكيبان من خلال التعبير ديال بنتو أن عائلة فرس تضررت بزاف من هذا الشي.
للإشارة فأحمد فرس دار زيارة قبل أيام قليلة، للرفيق ديال الكاريير ديالو فالمنتخب الوطني المغربي وشباب المحمدية حسن أمشراط “عسيلة” اللي ناعس فكلينيك بكازا حيث مريض، والثنائي فرس وعسيلة من الجيل الذهبي المتوج بكاس افريقيا الوحيدة فتاريخ المغرب عام 1976.
