كود سبور//
سكت محمد بودريقة رئيس الرجاء الرياضي المشككين فالانتدابات اللي دار باش يدعم صفوف الفريق الاخضر، خلال الميركاتو الصيفي الحالي.
وبعدما ناض الصداع على اللاعب الجديد الجنوب افريقي هاشم دومينكو، والحملة اللي دارو ليباج على مواقع التواصل الاجتماعي اللي كيوصفو ريوسهم أنهم رجاويين، وتشكيكهم فقدرة اللاعب المذكور على أنه يلعب مع الفريق حيث موعت وعندو اصابة صعيبة، وان التعاقد معه كان غلط من محمد بودريقة، ناضو الرجاء نشرو صورة لهشام دومينكو وهو كيتدرب بالكرة، وماداير حتى حاجة طبية فرجليه، وهذا بمثابة رد قوي من رئيس النادي على ليباج اللي كيتحججو خلال الايام الماضي بإصابة دومينكو وضاغطين على بريزيدون الرجاء، وليل منو على ان اللاعب بخير وماشي عاجز على اللعب.
وعرفت مؤخرا العلاقة بين محمد بودريقة وشي باجات على موقع فيسبوك توتر كبير، لدرجة ان عدد منهم دايرين حملة ومكدمين معهم واحد الفئة من الجماهير ودايرين السبة بالانتدابات، واخا ان المكتب الحالي برئاسة بودريقة جاب لاعبين جداد وكيحل مشكل المنع من الانتدابات وخلص بريمات اللاعبين، بعدما زاد الرئيس السابق عزيز البدراوي وخلاها غارقة، والغريب ان هاد ليباج اغلبهم كان كيطالب بالكالم من جماهير الرجاء أيام البدراوي.