كود سبور//
بانت الحقيقة ديال التسيير الكارثي لعزيز البدراوي رئيس الرجاء الرياضي، وتعرا وتفضح قدام الجماهير الرجاوية، اللي تأكدت أن هاد الشخص هو أكبر كذبة وسرحة في تاريخ الفريق العالمي اللي كان كيتضرب به المثل في التسيير وطنيا وإفريقيا بالرؤساء اللي دازو فيه.
الوضعية الكارثية اللي كيعيشها الرجاء الرياضي منذ أشهر وبالضبط ملي طلع عزيز البدراوي رئيس للنادي في شهر يونيو 2022 وإلى حدود الآن عرات حقيقة “مول الزبل” اللي باع الوهم للجماهير الرجاوية ملي كان يقول “الرجاء غانعطيها دمي وإلى ما رجعتهاش علقوني من لساني”.
اللاعبين ديال الفريق اللي ما واخدينش هم والطاقم التقني مستحقاتهم منذ أشهر، وعياو من الصبر وكذوب الرئيس الثرثار، والتخاذل ديالو في الدفاع عن مصالح الفريق من خلال توفير موارد مالية قارة يقدر يؤدي بها فلوس اللاعبين ويوفر شروط الراحة في التنقلات وغيرها من حاجيات الفريق.
عجز عزيز البدراوي اللي لسانو سابقو في إعطاء الوعود دون الوفاء بها، جعل فريق الرجاء الرياضي هذا الموسم يبان ضعيف بزاف ولولا الاسم وشعار النسر واللون الأبيض والأخضر والجمهور الكبير ما تقولش هذا الرجاء ديال بوعبيد وأوزال وعمور وغنام وبودريقة والزيات وغيرهم من الرؤساء الصحاح اللي كانوا يجيبوا الموارد المالية الصحيحة، ويصرفوا على الفريق، واللي شاف الخضرا وهي كتخسر أمام الفتح الرياضي الماتش د البارح فالبطولة بدون روح، ما يقولش أن هذا هو الفريق العالمي الرائد وطنيا وإفريقيا في حصد الألقاب وصناعة التاريخ.
محاولات عزيز البدراوي الهروب من تحمل المسؤولية في الحالة الصعيبة والأزمة اللي وصل لها الرجاء الرياضي ومن بعدما تعرات حقيقة لكذوب ديالو، هادشي جعل جماهير الخضرا تبدا تحرك وتطالب بالتغييرات ورفعت شعار “باسطا” في وجه “مول شاحنات جمع الازبال” باش يرجع لزبلو من بعدما تبين مع مرور الوقت أنه جا يخدم مصلحتو الشخصية ماشي يخدم الرجاء كيفما كان كيقول ملي بغا يترشح لرئاسة النادي.