كود سبور//
حذر خافيير تيباس رئيس رابطة الدوري الإسباني لكرة القدم، من إقامة كأس العالم للأندية 2025 اللي مشارك فيها الوداد الرياضي، وطالب رئيس الاتحاد الدولي للعبة جياني إنفانتينو بأنه يلغيها، حيث ما عندها منفعة لا للاعبين ولا للأندية من غير أنها غاتخربق الكورة.
وخلال المشاركة ديالو فالمنتدى الثاني للاتحاد الأوروبي للأندية فبلجيكا، قال خافيير تيباس: “رئيس الفيفا، أنت عارف مزيان بلي ما بعتيش حقوق البث التلفزيوني بالثمن المقدر اللي أعلنت عليه، وانت عارف بلي ما جبتيش السبونسور بالحجم المطلوب كيفما كنت باغي، وعارف مزيان أن رابطة اللاعبين المحترفين ما باغياش هاد البطولة، داكشي علاش لغيها من دابا”.
وكمل المسؤول فالكورة الإسبانية وقال لأنفنتينو: “إذا مول الاتحاد الدولي بالفلوس تنظيم مونديال الأندية 2025، راه هاد الشي غايكون على حساب المناطق اللي كايدّعيو الفيفا أنهم باغيين يعاونوها وهذا الشي غايكلف كثر من مليار ونص أورو”.
وزاد خافيير تيباس أكد على رئيس أنفانتينو: “لغيها وگلس للمفاوضات، راه الحوار ماشي هو التفاوض، المفاوضات النتيجة ديالها هو اتفاق، أما الحوار راه ما عندو نتيجة، والحوار ديالنا مع الفيفا راه طول لسنوات وبلا نتيجة، راه ما يمكنش نوصلو لاتفاق وكأس العالم للاندية 2025 غاياتهم”.
وكايواجه الاتحاد الدولي لكرة القدم موجة غضب كبيرو بسبب الأجندة العامرة ديال المسابقات اللي منظمها، وكانت رابطة اللاعبين المحترفين وروابط البطولات الأوروبية حطو شكاية عند المفوضية الأوروبية ضد الفيفا بسوء استغلال المنصب من خلال توسيع المسابقات وكثرة الماتشات، وأن هذا الشي ينتهك القانون الأوروبي، ويشكل خطر على اللاعبين وصحتهم والجانب الاجتماعي ديالهم وخطر على الأندية واستقرارها المالي، ومن البطولات اللي تشكاو منها كأس العالم للأمم 2026، وكأس العالم للأندية 2025.
