كود سبور//
قرر الدولي المغربي حكيم زياش يخرج على كرة القدم، ويهضر فالسياسة، المجال اللي بعيد عليه وما كايفهم فيه والو، وباغي يحمل المغرب مسؤولية ضحيا الصراع بين فلسطين واسرائيل.
وخرج حكيم زياش لاعب گلطة سراي التركي، ونشر سطور على إنستغرام، حمل فيه مسؤولية ما يقع بين فلسطين واسرائيل من مجاز للحكومة المغربية، وهذا دليل على أنه الكوايري واخا يكون محترف بأندية كبيرة وعالمية، إلى ما كانش فاهم وواعي وعندو ثقافة غايبدا يخرج ويدخل فالهضرة بحال حكيم زياش.
https://www.facebook.com/share/p/oRXVQTSFUKGVFbf5/
حكيم زياش اللي طالع للجمهور المغربي فراسو بسبب السلوكات ديالو مؤخرا فالمنتخب المغربي، قال فالسطوري ديالو: “عار على الحكومة المغربية دعمها للمجزرة.. والمغاربة خليو صوتكم عالي مع خوتنا ففلسطين”.
ومن المنتظر تخلق الخرجة ديال حكيم زياش جدل كبير، خصوصا وان المغرب كان ديما مع دعم الشعب الفلسطيني والقضية ديالو وكاتعتبر المملكة المغربية القضية الفلسطينية، قضيتها الاولى بحالها بحال قضية الوحدة الترابية، وهذا الشي كايبين ان زياش خاصو يمشي يقرا ويبحث فالتاريخ باش يعرف أن المغرب كان ديما داعم رئيسي للشعب الفلسطيني ومدافع على القضية ديالو، بالفعل وماشي بالسطوريات.
