كود سبور//
خلف التراجع على قرار منع جماهير الجيش الملكي من التنقل لمدينة تطوان لحضور ماتش فريقها ضد المغرب التطواني الاحد الجاي فتيران سانية الرمل برسم الدورة 29 من البطولة الاحترافية لكرة القدم، والسماح لمشجعي الفريق العسكري بالتنقل إلى تطوان لحضور هذه المباراة، وبالمقابل منع الجمهور من حضور ماتش الرجاء الرياضي منافس ليفار على اللقب اللي لاعب ضد الوداد الرياضي ومنع المشجعين من حضور الديربي، علامات استفهام كبير وكاشي كيسول “علاش فريق الجيش الملكي عطينهم امتيازات على الرجا؟”.
والمثير للاستغراب هو دخلو أحزاب سياسية على خط السماح لجمهور الجيش الملكي بالتنقل لتطوان وحضور الماتش ديال الفريق ضد المغرب التطواني فسانية الرمل، والأكثر من هذا الشي هو أن المستشار الجماعي فالرباط عن فدرالية اليسار الديمقراطي فاروق مهداوي والمستشار اللي معه فنفس الجماعة وعن حزب الأصالة والمعاصرة محمد جاد زهراش راسلو والي جهة الرباط سلا القنيطرة باش يطلبو منو التدخل العاجل لفائدة جمهور فريق الجيش الملكي، وهذا وسط استغراب الجماهير المغربية بمختلف انتماءاتها الرياضية.
وهنا علامات استفهام كتطرح، واش هاد الناس عارفين أن السياسة ما خاصهاش تدخل فالرياضة وتختلط بها ولا ما عارفينش ؟ أو أن الانتماء الرياضي ديالهم عمى البصيرة السياسية وخلاهم هما كمسؤولين فجماعة مدينة الرباط، اللي الدور ديالهم هو خدمة المواطنين المغاربة وسكان الرباط بمختلف الانتماءات الرياضية ديالهم واللي انتاخبوهم هما والحزبين ديالهم باش يقدمو خدمات لهم يتخلاو على هذا الشي وبالمقابل، ينوضو يديرو التفرقة وسط الرباطين والمغاربة بين مشجع للجيش الملكي يعاونوه باش يحضر ماتش الفريق ديالو ومشجع رجاوي يتمنع من حضور ماتش الفريق الاخضر وحتى جهة ما تدوي عليه، والسؤال هنا واش هاد الجوج مسؤولين جماعيين دارو هاد الخطوات باش يعاونو جمهور الجيش الملكي على حساب جمهور الرجاء من تلقاء أنفسهم غلبتهم العاطفة وحب فريقهم ولا كاينة شي حاجة اخرى؟ وعلاش فريق الجيش الملكي ياخد امتياز حضور الجمهور ديالو فهاد الماتش الحاسم ضد المغرب التطواني وبالمقابل المنافس ديالو على لقب البطولة الرجاء الرياضي يتحرم فنفس الدورة من حضور الجمهور ماتش الدريبي امام الوداد الرياضي.
وللإشارة فالرجاء الرياضي تمنع الجمهور ديالهم من حضور عدد من الماتشات اللي استضافهم الفريق فتيران برشيد فهاد الموسم، وبالمقابل كان جمهور الجيش الملكي كيحضر فالماتشات ديال الفريق فتيران القنيطرة، وهذا الشي كيخلي الرجاويين يحتجو مدة هادي وكيطالبو بمبدأ تكافؤ الفرص، وكيشىوفو ان المنافس ديالهم ليفار عندو امتيازات والفريق الاخضر محروم منها.