مصطفى الشاذلي- كود//
سعيد الناصيري رئيس نادي الوداد البيضاوي متابع فقضية ثقيلة، بدا فيه التحقيق منذ أشهر. هذا شأن قضائي خاص معند تا واحد فيه الدخل من غير الجهات المختصة، ولكن العكس هو اللي واقع تماما منذ مدة ليست بالقصيرة.
خصوصية القضية هي أنها كتهم فريق عريق وماشي عادي فالمغرب، وهو أحسن فريق فالمغرب منذ 10 سنوات، لأن الرئيس ديالو وهو اللي صنع هاد الأمجاد مسلطة عليه حملة إعلامية كبيرة، فيها بزاف د الفايك نيوز والضرب د الكرة الوطنية.
ايلا كان سعيد الناصيري داير علاش يتعتقل، فهذا أمر طبيعي وبل واجب يكون، ولكن غير الطبيعي هو ربط نجاحات الوداد والكرة المغربية عامة بالقضية اللي معتقل فيه سعيد الناصيري، والتشكيك فكاع الإنجازات اللي تحققات فالفترة الأخيرة.
سرية البحث متحترماتش منذ اليوم الأول، والتواصل حول القضية تدارو فيه أخطاء كبيرة، لخصوصية القضية كان لا بد يكون تواصل رسمي يقطع الباب على التأويلات اللي الآن ولات كضرب فسمعة المغرب الرياضية وبدون شك غادي يتم الاستثمار ديالها أكثر من طرف أعداء المغرب.
النتائج اللي حققوها الوداد ولا المنتخب، جات بجهد وتعب وماشي عطاها شي واحد ولا تصدق بيها، ومن العيب أننا فالمغرب وصلنا قضية جنائية لأنها تأثر على صورة بلاد كاملة، وبدون منخممو فالعواقب.
الأن الأمور كتبان أنها خرجات عن نطاق السيطرة تواصليا، وتا واحد معارف المستقبل اش كيخبي للوداد هاد الفريق المغربي الكبير، ولا للمغرب قاريا وتعاطي الإعلام معاه.