كود سبور//
كيواصلو اللاعبين الدوليين المغاربة من الجيل الحالي د المنتخب الوطني المغربي لكرة القدم الانخراط فالاعمال الاجتماعية والخيرية، وهذه المرة جات نوبة أيمن برقوق اللي دار مبادرة تجاه 2 أطفال محتاجين لعمليات بالمغرب ودارها لهم على حسابو.
وحسب نوال الفيلالي رئيسة جمعية أجي نتعاونو فاللاعب المغربي ايمن برقوق قام بالتكفل بعمليتين جراحيتين مكلفتين لطفلين من الحالات ديال الجمعية.
نوال الفيلالي وضحت ان الحالة الاولى لطفلة يتيمة الام و خاصها عملية على المسران الغليظ، وتكفل بمبلغ 45000 درهم و هي من نواحي شفشاون، والحالة الثانية خاصها عملية القلب المفتوح و هي لطفل من فاس و ثمنها 80000 درهم.
أيمن برقوق زار براسو الحالتين فالسبيطار، وأكدت نوال الفيلالي انه جاب كادويات للأطفال اللي كاينين فالكلينيك، وخلق وسطهم الفرحة.