وكالات//
كشفت واحد العارضة ديال الأزياء الإسبانية المعروفة على تفاصيل مثيرة بخصوص محاولة استقطابها لحضور حفلة عيد الميلاد ديال النجم المغربي الأصل لامين جمال، اللي دار مؤخراً 18 عام واحتفل بها فجو فاخر ووسط ضجة كبيرة فالإعلام.
العارضة، اللي ما بغاوش يكشفو على سميتها فوسائل الإعلام، قالت فواحد البرنامج التلفزيوني أنها توصلات بعرض مالي ما بين 10 و20 ألف يورو باش تحضر الحفل، اللي تدار فمدينة برشلونة، وأن اللي تاصل بيها هوم منظمين الحفل اللي كانو، حسب كلامها، كيقلبو على بنات عندهم مواصفات جسدية معينة باش يشاركو فالحفل.
ووضحات العارضة أن المنظمين طلبو منها بالتحديد “بنت شقراء وعندها صدر بارز”، ووصفت هاد الطلب بـ”المستفز والسطحي”، ورفضات الحضور، بحيث قالت بللي هاد النوع من الطلبات كيقلل من قيمة المرأة وكايختزلها غير فالمظهر الخارجي.
الرد ديال العارضة خلق جدل كبير فمواقع التواصل الاجتماعي، كاين اللي شافو على أنه موقف شجاع ضد “تسليع النساء فحفلات الأغنياء والمشاهير”، وكاين اللي بدا كيتساءل على طبيعة الحفل اللي دار لامين يمال، خصوصاً بعد ما خرجات أخبار كتقول أن الهدايا اللي توزعات فالحفل كانت فاخرة وكاتسوى الملايين.