گود سبور//
ما تدارش الجمع العام غير العادي للوداد الرياضي اللي كان مقرر يكون مساء الأربعاء 10 ديسمبر 2025 فـ الدار البيضاء لعدم اكتمال النصاب القانوني وسط انقسام منخرطين النادي على طريقة تسيير هشام آية منا للنادي، وشكوا بأن غياب المنخرطين كان مخطط له وأن اللي ما حضروش الجمع العام هما محسوبين عليه وغيابهم كان لغاية ما، واللي حضرو هما المعارضين له، ومن المنتظر يتعقد الجمع العام غير العادي مرة أخرى بعد 15 يوم من الموعد الأول.
وفـ تصريح له هضر المنخرط الودادي كريم الگلايبي على عدم انعقاد الجمع العام، وقال فـ تصريح لـ گود: “حنا كانعارضو الحاجة اللي ضد مصلحة الوداد والنقد ديالنا بناء وعلى معطيات وما كانطبلوش لشي رئيس وكاتهمنا غير مصلحة الحمرا وغير المعارضين اللي جاو للجمع العام وفيهم اللي جاي من برا المغرب وخاسر فلوس باش يحضر وسابقة ما يكونش النصاب القانوني فـ الواك وملي طلبنا من المكتب المديري يعطيونا لائحة المنخرطين اللي تغيبو باش نتواصلو معهم يجيو ما توصلناش بها.. الرئيس رفع الجلسة بسرعة واللي كايدخل الشك هو أن واحد من أعضاء المكتب المديري قال قبل أيام إن النصاب القانوني ما غاديش يكون يوم الاربعاء.. الوداد ديال جمهورها اللي ماتو على قبلها وتشدو فـ الحبس على قبلها”.
اما المنخرط الودادي محمد المزابي فوضح وقال: “الجمع العام غير العادي فيه 3 نقاط توصلو بها المنخرطين، وكاين فـ المنخرطين اللي ساكن خارج المغرب والعدد ديالهم مهم وما قدروش يحضرو والمنخرطين الوداديين بالدارالبيضاء ربما العمل وفـ وسط السيمانا كان صعيب نحضرو كاملين ويكمل النصاب، وعكس ما يتم الترويج له من المشوشين على الوداد اللي اليوم واخد السكة والمكان العادي ديالو وسيادة المشهد الرياضي وطنيا وقاريا، وحنا كمنخرطين بالوداد نناقش جميع النقاط بعقلانية باستحضار مصلحة الوداد والمصلحة العليا للرياضة الوطنية والصورة ديالنا كنادي مرجعي داخل المملكة المغربية”.
وكمل المزابي وقال: “اليوم فتحنا نقاش ودي مع الرئيس والمكتب المسير ربما نختلف فـ نقاط ونتافقو فـ نقاط ولكن الأهم هي مصلحة الوداد، وكونو على يقين أن منخرطين الوداد غايجيو للجمع العام الجاي وزاد المزابي: ها علاش تغيبو منخرطين الوداد وكان صعيب عليهم يحضرو والجمع الجاي غايجيو.. حنا الوداديين كايسخن عندنا الدم على قبل الحمرا ولكن كاتوحدنا مصلحة الواك وما عندناش البلطجة واللي كايقولو غياب المنخرطين كان مخطط له راهم ناس مأجورين وغرضهم زعزعة البيت الودادي”.
گود سول محمد المزابي على ما يروج بخصوص أن غياب منخرطين الوداد عن الجمع العام كان مخطط له، وجاوب وقال: “كان عندنا اجتماع تنسيقي يوم السبت وما قلناش أننا ما غاديش نحضرو والناس اللي كايقولو مخطط له الهدف ديالهم هو زعزعة البيت الوداد والاستقرار ديالو.. غادي يسخن الدم لمصلحة الوداد ويترفع الصوت لمصلحة النادي وما عندناش البلطجة والناس اللي جايين لاهداف شخصية، وكلنا جايين لمصلحة الوداد وهذا هو الاتفاق بيننا وبين رئيس النادي والمكتب والمسير وكونو على يقين الجمع العام الجاي والمرحلة القادمة غادي يكون البيت الودادي موحد لمصلحة الوداد”.