گود سبور//
كايبان أن مشاركة الكاميرون فـ كاس أفريقيا “المغرب2025”، ما غاديش تكون عادية، وسبقها اللغط والأزمة داخل مكونات الكورة والرياضة الكاميرونية، ما بين الاتحاد الكاميروني اللي على راسو الأسطورة صامويل إيتو ووزارة الرياضة، وهذا الشي من غير مشكل المدرب البلجيكي مارك بريس اللي طيرو إيتو من تدريب المنتخب ودار بلاصتو ولد البلاد دفيد باگو، قبل أيام من انطلاق الكان، مع العلم ان المدرب البلجيكي مازال متمسك بالبوسط ديالو وخرج حتى لاليست ديالو باش باغي يشارك فـ كوب دافريك.
وهذه المرة خرجت جريدة The Sun البريطانية، معلومة كاتقول ان استبعاد فيسنت ابوبكر مهاجم المنتخب الكاميرون من لاليست المنتخب الكاميروني اللي صاوبها المدرب الجديد ديفيد باگو ماشي عادي ولا تقني، ولكن وراه صامويل إيتو، والقضية فيها ان ايتو الهداف التاريخي لمنتخب الكاميرون برصيد 56 هدف من 118 ماتش لعبهم، خايف على هذا الرقم يتحطم له، من طرف المهاجم فيسنت ابوبكر اللي عندو 45 هدف مع المنتخب الكاميروني ماركاهم فـ 117 ماتش، مع العلم ان فيسنت ابوبكر هو من ابرز المهاجمين وهداف الكاميرون خلال السنوات الأخيرة الماضية.
وقالت الجريدة البريطانية ان صامويل ايتو اللي ورا قرار إبعاد فيسنت ابوبكر من منتخب الكاميرون المشارك فـ كاس أفريقيا، حيث خايف من هداك 12 هدف اللي ما بيناتهم يتقلص ويحطمو ابوبكر وياخد له لقب الهداف التاريخي ديال الكاميرون، وهذا كايبين الغيرة اللي كاتكون ما بين اللاعبين واخا يعتازلو وياخدو مناصب فـ التسيير الرياضي، الأمر اللي يقدر يؤثر على القرارات ديالهم بشكل سلبي.