كود سبور//
بدا المنتخب الوطني المغربي المرحلة الأخيرة من الاستعدادات لكاس العالم 2026، ورجعو اللعابا للتداريب اليوم الجمعة بعدما خداو عطلة العيد ليومين.
ودارو المنتخب الوطني المغربي حصة تدريبية اليوم الجمعة فالعشية تحت إشراف الناخب الوطني محمد وهبي، وعرفت حضور گاع اللاعبين اللي معطين وهبي للمشاركة فالمونديال، باستثناء اشرف حكيمي اللي كاين مع الفريق ديالو باريس سان جرمان ولاعب معهم فينال دوري أبطال أوروبا غدا السبت وملي غايسالي غادي يلتحق بالمعسكر، ونفس الشي بالنسبة لشادي رياضي اللي غير يرتاح من فينال الكونرونس ليگ اللي ربحو مع كريستال بالاس ول البارح، غادي يلتحق حتى هو.
الحصة التدريبية دازت فأجواء حماسية وركز فيها الناخب الوطني محمد وهبي على الجانب التكتيكي وعلى الجانب البدني د اللاعبين، حيث راجعين من فراقيهم بعد نهاية موسم طويل، وخاصهم يكونو واجدين بدنيا لمسابقة قاصحة بقيمة كاس العالم، باش تكون عندهم لافريشور فيزيك ويتجنبو الاصابة، وبالمقابل تدرب نايف أگرد بوحدو تداريب انفرادية مع المعد البدني.
وغادي يلعب المنتخب الوطني المغربي يوم 2 يونيو مع منتخب مدغشقر ماتش اميكال فتيران مولاي عبد الله، ومن وراها غايشدو الطيارة نهار 3 يونيو لميريكان، وفيها غادي يلعبو آخر ماتش اميكال وغايكون ضد النرويج يوم 7 يونيو.