كود سبور//
حقق الرجاء الرياضي أول رباح له فبطولة هذا الموسم، بعدما قلب الماتش اليوم الاحد فتيران المسيرة الخضرا بآسفي على المضيف ديالو أولمبيك اسفي برسم الدورة 4.
وسالا الماتش بين الرجاء الرياضي وأولمبيك آسفي لمصلحة الفريق الأخضر، بنتيجة 3 مقابل 2، وقدرو الرجاء يماركيو الاولين بهدف ديال يسري بوزوق فالدقيقة 21، وماركاو اسفي التعادل عن طريق عبد الغفور لميرات فالدقيقة 32، وزادو المسفيويين الهدف الثاني بواسط شيخنا ساماكي فالدقيقة 39، ورجع يسري بوزوق وماركا التعادل للرجاء فالدقيقة 72، قبل ما يخطف الفريق الأخضر الرباح بواسطة يوسف بالعامري فالوقت القاتل من المباراة.
وبهذه النتيجة قدرو الرجاء الرياضي يربحو أول ماتش لهم فبطولة هذا الموسم، وخداو أول 3 نقاط، وهو أول ماتش كايلعبوه بعدما حيدو المدرب البوسني روسمير سفيكو اللي جراو عليه بسبب البداية الكارثية فالبطولة وخسارة 2 ماتشات، وكايحتل الفريق المركز 12 بـ3 نقاط، أما أولمبيك آسفي بقات عندهم 4 نقاط، وكايحتلو المركز 10.
