كود سبور//
كشف الناخب الوطني وليد الركراكي أن حب المغرب والمنتخب الوطني المغربي، هما اللي خلاو براهيم دياز يجي يتفرج فماتش الأسود وإفريقيا الوسطى برسم الجولة الثالثة من إقصائيات كاس افريقيا2025، واليوم السبت فتيران وجدة، واخا موعت.
الناخب الوطني من بعدما المغرب ربح إفريقيا الوسطى وقال على حضور براهيم دياز اللي جا يتفرج من المدرجات، حيث توعت مع الفريق ديالو ريال مدريد وما يقدرش يلعب: “الحضور ديال براهيم دياز كايمشي مع العقيلة اللي كانبنيو، كاين التكتيك والكورة والاختيارات، والمهم هو روح الگروب، وملي جيت وانا كانهضر على انك تجي للمنتخب تلعب لبلادك وكاتلعب على قبل هذا الجمهور”.
وكمل الركراكي: “حنا جايين من السعيدية حتى للتيران والناس فالطريق، عندنا بلاد ديال الكورة، وغير على هذا الشي خاص اللاعبين يتقاتلو بعدا، واللي لبس توني المنتخب خاصو يؤمن انه ملي كايجي، راه كايجي باش يلعب على قبل هاد البلاد، ماشي يلعب لراسو، واللي ما كايفهمش هذا الشي كايبقى فالدار والاحتياط وبداو كايفهمو هذا الشي، وملي كاتشوف براهيم دياز مبليسي وباغي يجي يكون مع صحابو ويشوف المنتخب راه هذا الشي مزيان”.
