الشرعي: غنتقاتلو فالفينال التاريخي ضد مصر وكنطلب المغاربة يجيو يعاونونا

كود سبور//

اعتبر الناخب الوطني عصام الشرعي أنه ما كاين حتى شي فرق بين المنتخب المغربي الاولمبي ونظيرو المصري، واخا الأول لعب كثر من الثاني فعدد الدقائق ديال دومي فينال كوب دافريك لأقل من 23 عام، وأكد أن اللاعبين واجدين للفينال غذا السبت، وخاصهم يستمتعوا بهذه اللحظة والمباراة التاريخية.

وقال عصام الشرعي فالندوة الصحافية اللي كتسبق ماتش المغرب ومصر فنهائي كأس إفريقيا لاقل من 23 عام: “صحيح حنا لعبنا 120 دقيقة فالدومي فينال ومصر لعبت غير 90 ولكن هذا الفينال وخاصنا نكونو واجدين له، عندنا 25 لاعب كبابل باش نلعبو الماتش، يعني اذا كانوا عدنا لاعبين عيانين أو فيهم لافاتيك وما قادرينش يبداو الماتش راه كاينين لاعبين اللي واجدين باش يبداو المباراة وحنا تايقين فيهم”.

وزاد كمل الشرعي وقال: “مباراة  للتاريخ واللاعبين عارفين هذا الشي وكان مهم التأهل للألعاب الأولمبية، ودابا الفينال لاعبينو فبلادنا وهذا الشي مهم وكنفتاخرو به، وليكرادان د التيران غيكونو عامرين وكنشكر المغاربة على المساندة وكنتمنى غدا يكونو واجدين باش يساندونا وهذا الشي غيعاونا باش نربحو المباراة”.

وختم الشرعي: “اللاعبين كيعتبروا هذه المباراة أنها للتاريخ وأنا كنقولهم استمتعوا بهذه اللحظة  حيث لاعب الفينال فبلادك وقدام الجمهور ديالك ضد فريق قوي، اللي هو البطل ديال آخر كأس إفريقيا تحت 23 عام، ونتمناو نقدمو مباراة قوية”.

إقرأ الخبر من مصدره