كود سبور//
مرة مرة كاتخرج واحد الكليكا ديال الرجعيين، اللي باغيين يرجعو المغرب اللور بعد المجهودات اللي تدارت لسنوات فمجال المساواة بين المرأة والرجل، ولو هذه النتائج مازال ما كافياش حتى لدابا حيث المرأة مازال كاتحس براسها محگورة فعدد من المجالات بغينا ولا كرهنا.
هذه المرة خرجت واحد الرباعة ديال الذكوريين وطلقو حملة على مواقع للتواصل الاجتماعي، باغي من خلالها ينشرو الأفكار ديالهم الرجعية، ويحبسو البنات والعيالات باش ما يبقاوش يمشيو للتيرانات، وسماو الحملة ديالهم الهمجية المتخلفة بـ “#لا للنساء في المدرجات” و “شد ختك في الدار”.
الناس ديال هذه الحملة ضعاف بزاف، وملي كاتهضر مع شي واحد فيهم، كايبدا يتحجج بأنه مع هذه الحملة حيث مو او ختو او مرتو تقد تتعرض للتحرش وهي فالتيران وغيرها من مظاهر العنف ضد المرأة، وطبعا هذا الشي راه ممكن يوقع، ولكن راه خاصنا نعالجوه بطرق علمية، بحال نشر الوعي وثقافة المساواة بين المرأة والرجل وحقهم بجوج فالولوج إلى الأماكن العمومية وتطبيق القانون على المتحرشين، سوا الرجال اللي كايتحرشو بالعيالات او العيالات اللي كايتحرشو بالرجال، وهذه هي الخطوات الصحيحة لمحاربة العنف ضد النساء، ماشي ينوضو رباعة ديال الذكورة باغيين ينشرو أفكار رجعية ويسدو على المرأة فالدار بحالا هي شي حاجة محطوطة وصافي، راه خاصهم يعرفو أن المرأة والرجل بحال بحال ومتساويين فالحقوق والواجبات.
هذه الحملة خطيرة بزاف بالرغم من أنها ما غاديش تقدر تمس من المرأة المغربية والمؤمنين بحق النساء بحالهم بحال الرجال فأنهم يدخلو للتيرانات والأماكن العمومية، مع العلم ان بزاف من هاد الذكورة مكبوتين وهما أول المتحرشين بالمرأة إلى جاتهم الفرصة، وتقدر أفعالهم الشيطانية توصل حتى للاغتصاب والأمثلة راها كثيرة، وكيف ديما كايتغطاو بالدين والتقاليد باش يدافعو على افكارهم الرجعية اللي هدفها أن الذكر اللي يسيطر وأن الأنثى غير مكملين بها الماتش وما عندهاش حقوق فنظرهم وتفكريهم المتطرف والمتزمت وطبعا هذا الشي كل غلط حيث بحال المرأة بحال الرجل.
