محمد سقراط-كود///
أكفس إخراج تلفزي للماتشات ديال كاس العالم هو هذا ديال قطر، كاين واحد التركيز عجيب وغريب على الكورة فقط وشكون حداها، إخراج بدائي ومزموت ومافيهش روح تظاهرة كبرى بحال كاس العالم، النفل التلفزي لي كنعرف كيكونوا فيه إعادة المشاهد كثيرة أي لقة زوينة كيعاودها المخرج وبسلوموشن، أي مراوغة أو كونطرول أو لقطة كروية زوينة لي تبقى عالقة في الذاكرة كتعاود مرة وجوج، الأهداف حتى هي كذلك كتبقى تعاود دابا وساعة خصوصا الأهداف الزوينة، دابا كتلقى الحكم مدوز خمسة دقايق كيتسنى الفار ومع ذلك مكاين لا اعادات للقطات لا والو الكاميرة كتبقى شادة على الحكم وهو مجمع مع صحابو من ورا التلفازة.
الجمهور راه من أهم العناصر في الأحداث الرياضية الكبرى وكيستاحق الكاميرة تركز عليه بحالو بحال ميسي أو أي لعاب آخر، وفي الجمهور كاين الناس لي كتدير كريديات باش تحضر وتجي من آخر العالم وتلبس وتتأنق وتبدع في التشجيع، وبحال كاع التظاهرات السابقة الكاميرة فاش كتشد على الجمهور راه كتدير ليه تكريم وإحتفاء بالمجهود لي كيدير وبدوره، ولكن في مونتديال قطر الكاميرة إخوانية بحال الى القرضاوي هو لي من وراها كتبقى شادة غير على اللعابة وفاش كتشد شي لقطة في الجمهور في الغالب كيكون راجل كأن لا نساء بين الجمهور، وحتى فاش كتشد على شي مشجعة كتعمد تبين المشجعات العاديات لي يمكن تلقاهم حتى في تيران المصران في الداوديات أو كامبو دالشريف، بينما حسناوات العالم والعارضات والمشاهير الكاميرة محسابهمش حتى واش كاينين كأنهم ماشي مهمين في تظاهرة بحال هادي.
نقل مباشر لكأس العالم بلا حسناوات بلا جميلات بحال شي بث مباشر لصلاة العيد، كرة القدم راه ماشي غير جلدة منفوخة و22 لعاب كيجريو وراها، كرة القدم هي الأجواء والجمهور والإنفعالات والفرحة، كرة القدم هي حسناوات المدرجات والرجال المزوجين لي كتشدهم الكاميرة مع صحاباتهم في التيران وكيطلقوا من بعد التظاهرة، وهي الدموع الفرحة الفرحة والحزن مخلطة، وهي المشاعر الشاملة لي كتجتاح ملايين الناس في وقت واحد، النقل التلفزي لي مايوصلش هادشي كامل للمشاهد راه ما نقل ما والو، وعلى الأقل غير الإعادات للقطات والبيوت، أما هاد الحالة لي تبعنا بيها المونديال لحد الآن راه دون المستوى.
