احتضن مركب الأعمال الاجتماعية بالرباط لبارح الاثنين، حفل إعطاء انطلاقة تحدي القراءة اللي غتشرف عليه وزارة التربية .
هاذ البرنامج مستورد من الإمارات ومن نسخة تحدي القراءة العربي وحتا التمويل إماراتي.
البرنامج اللي قدمو المفتش التربوي اللي كان مدير المناهج، أعلن عنه بشكل مفاجئ وبدون أي سياق، وحتا الناس ديال الوزارة معمرهم سمعو بيه حتى طاح من السما.
هاذ البرنامج جابو المفتش التربوي معاه من الإمارات، وسبق للإمارات سوقوه فمصر وراه خدام دابا.
معنى ذلك، هاذ البرنامج ديال تحدي القراءة خاصنا نزيدوه على مشاريع الاختراق لي خدامة عليها الإمارات غي بالفن وبمسميات شتى، مقابل جوج دريال الدعم.
بزاف ديال الناس اللي حضروا لحفل تقديم المسابقة، معجبهمش الحال، حتا سمية المسابقات بقات بالاسم الأصلي ديال المسابقة فالإمارات.
مدرسة التنوير، مسابقة الطالب الماسي، وسميات خرى معندها تا معنى.
واش الإمارات اللي عندها 50 عام غتعلمنا حنا التنوير بعدما استدعات الوزارة نجلاء سيف الشامسي رئيسة مؤسسة البحث العلمي تحضر انطلاقة هاذ البرنامج.
هاذ البرنامج اللي وصفو مفتش تربوي بشلاظة معندو لا ساس لا راس. علاش حيث غادي تشارك فيه دور النشر، دور الشباب، الجمعيات القرائية، وأي واحد بغى، وكاين اللي ربط بين علاقة مديرية المناهج اللي كان فيها شفيق بإقحام دور النشر.
المفتش التربوي اللي هدر مع كود، قال باللي برنامج بهاذ الشكل يمكن ديرو وزارة الثقافة ولا الشباب، وباركا على بنموسى يصلح عمق المنظومة وهو يلاه هاذي أسبوع صدمنا بأرقام خطيرة، بلاما يحمل المسؤولية ديال هاذ الشي لحتا شي جهة.
هاذ البرنامج اعتابرو مصدر كود غيضرب تلفة للتعليم حيث كلشي غيولي مشغول مع هاذ البرنامج اللي فيه شوية لفلوس كتسيل اللعاب ديال الأساتذة ممكن يخليو خدمتهم ويتبعوا المسابقة ويضيعوا ولاد عباد الله.
هاذ البرنامج فيه واحد شلاظة داخلة فبعضياتها، منها واش الوزارة ناوية طبع هاذ الكم الكبير من الكتب ومنين غتجيب الفلوس، ويلا كانوا المشاركين هما اللي غيشريوا فراه هدية لدور النشر.
الوزير بنموسى اللي ترأس هاذ الحفل واش مفكرش أن ديك 70 فالمية اللي قال مكتعرفش تقرا غير معنية بهاذ الشي، وأن الأولوية هيا نعلموا هاذوك 70 فالمية يقراو، ولا ناوي يخدم مع 30 فالمية ولهلا يقلب بالأغلبية الساحقة.
هاذ البرنامج يمكن يكون عندو الأهمية ديالو ولكن فهاذ التوقيت راه الأولوية للتربية والتعليم فالحد الأدنى علموا الناس تقرا ومن بعدا ندوز لهاذ النوع من الأنشطة.
باين باللي بنموسى غي تابع جيلالة ديال الوزارة بالنافخ، ومعندو حتا شي برنامج ديالو من بعدما دازت عام وشهرين والسيد مازال متخبط فالتدبير ديال الأزمات.
يلا كان ضروري يكونوا بحال هاذ البرامج فراه خاص البعد المحلي والجهوي يحضر ونبعدوا من الهيلالة ونبعدوا المسؤولين اللي فشلوا فأوراش كبرى من هاذ القضايا اللي كيشوفوا فيها غي الهموز واللعاقة، أما التعليم فهو آخر همهم.
شفيق كان مدير المناهج اللي عندو علاقة وطيدة بدور النشر، يعني هاذ التضارب كيفتح باب لأسئلة واش باغيين يتهلاو فدور النشر ويعاونهم يتفكوا من صطوك اللي عندهم واللي غادي وكيتزاد بسبب الثورة الرقمية؟ واش ماشي إهانة للمغرب يعجز على إخراج برنامج قراءة وطنية بهوية ومرجعية مغربية؟ فين تمغرابيت ولجان الخبراء والأدباء ووزارة الثقافة وأكاديمية المملكة من هاذ المشاريع اللي كتنبث بحال الفطر وكدوز بلا أثر من غير طحن الميزانيات؟..
إقرأ الخبر من مصدره
