سهام البارودي ـ كود//
كايطلعو ليا بزاف د الڤيديوات مؤخرا د دنيا بطمة كاتغني فالكاباريات ! كل مرة فكاباري جديد! حطّة جديدة والغرامة كاتشتت! الفلوس كي الروز !
أنا عزيزة عليا دنيا بطمة ولكن كاتجيني ديك البنت دايرة فحال شي لامبورغيني عند شي فرملية كاتمشي بيها للسبيطار وتجي فالعشية ! ولا فحال إلى قلتي شي واحد عندو قصر فيه ستين بيت وبيسين وجرادي كبار وهوا ساد عليه فبيت واحد مفرش فيه حصيرة وبوطة صغيرة !
دابا واش صوتك آ بنتي آدنيا ديال الكاباريات؟! صافي هذا جهدك؟! ماكاين ألبومات؟ ماكاين أغاني؟ دويتويات؟ والو! وا هااا هاااه على مشموم خواتاتو على سواط عيالاتو ! على عشاق صحاباتو ! وعطيه العصير عطيه في كاس كبير عطيه … هادشي خليه لأميمة باعزية ! لإكرام العبدية… ولد مّيليكة! الدراري لي كايضبرو على راسهم! العونيات ! ماشي نتي !
إيه راه كادخل الفلوس! الزبابل د الفلوس ولكن وحدة بالصوت ديالها راه تقدر دخّل فلوس أكثر إلى عرفات تجيري لاكاريير ديالها ! والمسألة ماشي غير مسألة فلوس وصافي كاينة واحد الحاجة سميتها ليماج ديال الفنّان ليماج لي كاتخليه مطلوب والقيمة السوقية ديالو طالعة وديما طالعة ماعمرها طيح! شوف دابا داك العفريت ديال المجرد؟ واش يمشي يغني ليك فشي بار دار القاضي عامرة جرادي دار الباشا عامرة كراسا؟! و لا يمشي افتتاح ديال صالون أسماء بيوتي فالقنيطرة ؟ ولا يدير إشهار ديال شي كريم د الوجه مامعروفاش فالانستغرام ؟ القلاوي على عينيك! تايشوف غا الفوق هاداك! كون ما ديك القضية ديال الاغتصاب لي خوّر بيها راسو كوراه دابا هوا الوجه الإعلامي ديال Hugo Boss ولا رالف لورين و لا شي ماركة كبيرة فالشرق الأوسط ! للاسف ديك البنت ماعندهاش طموح ! محدودة بزّاف! آش دارت دابا؟ فيناهي لاكاريير؟ والو! كاتغني فالكاباريات فحال أيتها مغنية عادية جدا بصوت عادي جدا!
طبعا الكاباري ماشي عيب وطبعا فنانين كبار غناو فالكاباريات ! الفكرة ماشي هي هادي! الفكرة هي أنه دنيا بطمة تستاهل ما احسن، صوتها قوي وواعر واحسن من أنه يبقى محصور فالكاباري ! صوتها تقدر تعمّر بيه الأولامبيا فباريس… وشنو؟ راه نجاة عتابو وعمّرات الأولامبيا ! ولكن للأسف لونتوراج والذكاء د الفنان أهم من الصوت! الصوت راه كايعطيه ليك الله ماعندك فيه لا ناقة ولا جمل! كاتبقا نتا واش وجه الخير ولا وجه المحاكة!
إقرأ الخبر من مصدره
