كود سبور//
كيبحث عزيز البدراوي رئيس الرجاء الرياضي يعطي الشرعية للمكتب المديري ديالو قدام المنخرطين والجماهير الرجاوية خلال المرحلة المقبلة من العهدة التسييرية ديالو كرئيس للخضرا، من بعدما جاب شي وحدين برانيين شكل معه المكتب قبل أشهر ولكن ما سلكوهش حيث ما فاهمينش فالتسيير ديال النادي.
وكشف مصدر مطلع أن عزيز البدراوي، عرف بلي من بين الهفوات ديالو التسييرية ملي جا للرجاء الرياضي وطلع رئيس، هي انه بعد المنخرطين ديالو النادي من التسيير وحتى المسييرين السابقين دار معهم قطيعة، وجاب اشخاص ما غرباء على النادي وما عندهم علاقة بالتسيير دخلهم للمكتب المديري وهادشي تسبب فسقوط الخضرا فعدد من الأخطاء الكارثية سوا فالتعاقدات أو النزاعات أو غيرها وهادشي أثر بشكل كبير على الفريق والنتائج ديالو.
نفس المصدر، أكد أن عزيز البدراوي كيحاول مدة هادي مع منخرطين بارزين بالنادي باش يدخلهم معه للمكتب المديري حيث باغي يبدل الأعضاء ولكن المنخرطين مترددين حيث ما عارفينش شنو النية ديالو وفنفس الوقت ما باغينش يتحسب عليهم شي حاجة ماشي فمصلحة الرجاء تحت رئاسة البدراوي.
وحسب نفس المصدر، فالبدراوي غيدير اجتماع اليوم مع المنخرطين اللي باغي يدخلهم للمكتب ديالو وهم مصطفى دحنان، والمحاميين خالد فكيرني، وعبد الله بيراوين، والإطار البنكي عبد الإله الإبراهيمي الناطق الرسمي السابق ديال الرجاء واللي باغي يعطيه ناطق رسمي فبلاصت الممثل سعد التسولي اللي غبر وما بقاش كيبان مدة هادي، وكاين حتى المنتج خالد النقري، بالإضافة إلى أسماء أخرى.
للإشارة فالمنخرطين بالرجاء الرياضي مازال مقلقين على عزيز البدراوي حيث بعدهم من التسيير فالرجاء ملي طلع رئيس، وكيلوموه بزاف على هادشي بالإضافة إلى أنه بعد حتى الرؤساء السابقين الملقبين بالحكماذ اللي كانوا دائما كيعطيو الاستشارات للمسييرين بالنادي والحلول.
إقرأ الخبر من مصدره
