هند لكلاوي كود ///
واش فيلم سينمائي فبلادنا ناقص وعيان تحتاج تكتب عليه؟ سؤال كنظن كيطرحوه عدد من الصحافيين والصحافيات. المتعة ديال الكتابة كتكون فالافلام الزوينة اللي كتشدك وكتنقلك لعوالم المخرج السينمائية. اللي كتبهرك وكتفاجأك وتقدر تخربقك مع شي تحف سينمائية. هنا كتكون متعة الكتابة على فيلم ممتع. لكن هاد المتعة كتمشي مع افلام ضعيفة لمخرجين يالله بداو. يكون اول فيلم ديالهم. ايلى كان مخرج عندو تجارب سينمائية وعور ليها العين فشي فيلم ديك الساعة مفهوم الكتبة.
هنا الكتبة ما كتعنيش الاشادة او الانتقام او الهدم. اللا. هنا كنهدر غير على الكتبة. على نشر شي حاجة على هاد الفيلم.
كثار من المخرجين السينمائيين اللي دارو فيلم وما نجحوش فيه كيعتاقدو ان الصحافيين والصحافيات كيشعرو بالسعادة باش ينتاقدو عملهم الفني. ابدا. راه الصحافي كيشعر بالسعادة بحال المشاهد باش يكون عمل فني ذكي سينمائي ديال بصاح عندو لغتو الخاصة بيه.
دابا تجي تهدر على فيلم بلا سيناريو او بسيناريو مهلهل. كتحس بالمخرج كيرقع فيه. الشخصيات هاربة عليه ومعاه القصة. مع مرور الدقايق كينسى شي حاجة ويرجع ليها. فهاد العينة من الافلام تجيب اللي بغيتي من الممثلين غادي يبقى عمل عرج. الممثل ما يقدرش ينقد ليك فيلم واخا يدير كثر من جهدو.
واش يصلاح للتلفزيون؟ يمكن اقل بكثير. ناقصاه السينما بزاف او ما فيهش غير شي بركة قليلة ديال هاد الفن الساحر الممتع
