سهام البارودي ـ كود//
كاتسمع ديما الرجال مابقاوش باغين يتزوجو فحالا حنا عايشين فالقرن زوج لي الراجل لي بيدو القرار د الزواج والعيالات مفعول بهن! مشا داك الوقت آ عمّي! اليوم راه الرجال الأغلبية الساحقة باغين يتزوجو وماكرهوش يتزوجو، علاش شكون كره يدخل يلقا مراتو كاتساينو، ماكلة سخونة، فراش سخون… شكون كره؟! بنادم راه إلى بكا قدامك كايخرج المني عوض الدموع! لا لي ساكن مع واليديه ولا لي ساكن بوحدو! الرجال باغين يتزوجو !
راه العيالات لي مابقاوش باغين يقضيو بلّي كان! مشا داك الوقت لي البنت كاتكون جالسة حتى كايجيبو ليها الراجل وكادّيه وهي وزهرها يقدر يكون خماس، سارح، تاجر فاسي كبير، فلاح، معلم… مشا داك الوقت لي كاتلقا فيه الخواتات هادي واخدة كولونيل وهادي واخدة صبّاغ! دابا العيالات الأغلبية ديالهم عندهم شروط، مابقاوش باغين لي كان، قراو وخدمو وحتى لي ماقراوش وخدمو عندهم شروط كايشوفو الرجال فالتلفزة فالأنترنيت فاليوتوب فالأستاغرام ماتقدرش تجيب ليها واحد ماكايحكش تا سنانو فيه ريحة الجلد د الطعارج كايبدل الگرصون من العيد العيد وتقبل بيه… مابقاش داك الوقت! دابا العيالات فاقو وعاقو وولاو تاهوما كايتشرّطو فالرجال وخاصو يكون طويل وخاصو الفلوس وخاصو دارو مانسكنش مع واليديه، وخاصو يكون حنين وخاص وخاص وخاص … ومن حقهم طبعا !
الزواج شحال هادي كان ساهل حيت كانو العيالات ماكايتشرطوش (الأغلبية طبعا)، كنتي كاتجيب المرا فحالا كاتشري معزة من السوق، هي باغا تزوج، وبّاها باغي يتهنَا منها، ومها باغا تسيفطها، غايعطيوها ليك والله يربح! هوما المباركين هنَيتيهم وهي المباركة غاتزوج ودير دارها وكوزينتها تاهي! دابا البنت خاسرين عليها والديها الفلوس، كايتمناوها تكون طبيبة ولا مهندسة، غير البيديكير لي كادير ليديها بثلتميات درهم، الميكرو بلايدين للحجبان عند ميا گلامور بألفين درهم، البيرمانون الرخيص بميا وعشرين درهم، البالاياج للشعر بألف درهم… مايمكنش تقبل ليك بگارديان ولا سودور ولا واحد عندو كروسة د الخضرة.. وهي كاضّل تشوف فانستاغرام البنات قدّها فالسن كايصوگو الرونج وكايدوزو شهر العسل فبالي…
المشكل لي مطروح اليوم أنه طموح العيالات هارب على طموح الرجال فالمغرب! شوف غي فالمدارس الأغلبية د القرّاية بنات والأغلبية د الخرّاية دراري! كاين واحد الاستهتار كبير عند الدراري بمستقبلهم كايخليهم يوصلو لسن الزواج ويلقاو راسهم ماعندهم باش يجيبو المرا وهنا داك العجز ديالهم كاينقالب لحقد على العيالات! بينما البنت دابا كاطّير فين باقي شي مرا كاتقبل على الزلط والميزيريا؟ مابقاوش! راه اليوتوب عامر بعيالات الرجال لي كايعريو تراميهم باش يخلصو الطريطة د الدار فالسكن الاقتصادي ويفرشو الصالون بالطلامط من سوق الكلب ويديرو بيت النعاس الدراري بالكوڤرليات ديال سبيدرمان !
مابقاوش العيالات كايقبلو بلّي كان! كلّشي باغي يصوڤي! شوف دابا الدرّي إلى كان ولد عائلة وقاري وخدام عندو منصب زوين واش كايبقا بلا زواج؟ طبعا لا! غايطيرو بيه! إيوا راه هنا فين عواجت الفگوسة!
إقرأ الخبر من مصدره
