كود -ITV//
كتخطط قناة ITV باش دير مسلسل درامي تاريخي جديد كيهضر على أن الملكة اليزابيث الأولى كانت متحولة جنسياً.
حسب التقارير، المسؤولين فالقناة كيقلبو على ’’ممثلات كيعرفو راسهم كعيالات متحولات جنسياً” باش يلعبو دور الأميرة تيودور فالمسلسل، لي غادي تدور الأحداث ديالو فالقصر مع باها Henry VIII.
جريدة The Sun قالت باللي المسلسل غادي يناقش’’سر كبير”، متعلق بالجنس الحقيقي ديال الملكة.
معروف على الملكة إليزابيث الأولى أنها كانت كتسمّى “الملكة العذرا” حيث ما تزوجاتش وما كانوش عندها أولاد، الحكم ديالها كان بين 1558 و1603 وكان مرتبط حتى بصورة الملك القوي.
من بعد ما فشل الغزو ديال الملك الإسباني أرمادا. عام 1588 قالت: “عارفة أن عندي جسد امرأة ضعيفة، ولكن عندي قلب ومعدة ديال ملك‘‘، بعض المهتمين بالتاريخ قالو إنها كانت كتُعاني من حالة طبية معروفة باسم Androgen Insensitivity Syndrome، وهي حالة كتخلي الشخص يبان بنت من برا ولكن ما عندوش رحم ولا مبايض.
كاينة حتى أسطورة أخرى سميتها ’’أسطورة بيسلي”، لي كتقول باللي الأميرة إليزابيث ماتت وهي صغيرة وتم تعويضها بولد عندو شعر أحمر، ولكن بزاف ديال المؤرخين كيرفضو هاد الرواية وكيعتابروها غا خريفة حيث كان صعيب باش يتقبلو شي وحدين أن امرأة كتحكم بقوة بحال الراجل .
المسلسل الجديد، لي غادي يكون مكوّن من 6 حلقات وعنوانو المؤقت Majesty، تم الإعلان عليه أول مرة فعام 2024، وغادي يتصور فالصيف الجاي باش يتعرض ف 2027.
