كود – وكالات ///

دشنات المغنية الفرنسية من أصول مالية Aya Nakamura سلسلة ديال 3 حفلات متابعة فملعب Stade de France لبارح  الجمعة، وولات أول فنانة مغنية بالفرنسية كتقدر تعمر هاد المعلمة الفنية بهاد الشكل.

فبداية الحفل، دخلات آية وسط تصفيقات كبيرة من الجمهور، بعدما تعرضات على الشاشة العملاقة صور ليها وهي طايرة فوق باريس بهليكوبتر وكتدوو على اشهر  المعالم ديال العاصمة الفرنسية قبل ما توصل لتيران.

https://www.instagram.com/reel/DY89xoCo0Sg/?igsh=MWhyczhtaW82ZHBnNA==

المفاجأة كانت ملي بانت على الشاشة لافتة كبيرة مكتوب فيها: “مستحيل يا آية، هادي باريس ماشي سوق باماكو”. وهي العبارة اللي كانو استعملوها نشطاء من اليمين المتطرف عام  2024 باش يعارضو مشاركتها فحفل افتتاح الألعاب الأولمبية بباريس.

بعد ثواني، شدات العافية فاللافتة المعروضة على الشاشة بطريقة استعراضية، وتحرقات كاملة، ومن وراها خرجات آية ناكامورا من وسط العافية مع الرقاصا ديالها، فواحد المشهد اللي اعتابرو بزاف ديال المتابعين رسالة ضد العنصرية والكراهية.

وكترجع هاد القضية لشهر مارس 2024، ملي هزو أفراد من جماعة يمينية متطرفة سميتها Les Natifs لافتة عنصرية ضد الفنانة بسبب أصولها الإفريقية ،وبعد متابعات قضائية، صدر فشتنبر 2025 حكم بغرامات مالية على عشرة أعضاء من المجموعة بتهمة السلوك المهين والتحريض.

إقرأ الخبر من مصدره