علي الصافي – كود العيون ///
بعدما تفرشات البوليساريو فالقمة الإفريقية-اليابانية تيكاد باليابان، وحاول بطل مغربي يتصدى ليهم بعدما فرشهم وشافهم جبدو لوحة مكتوب عليا اسم “الجمهورية الصحراوية”، وحطوها فطاولة الاجتماع.
كانت المخابرات الجزائرية، لي هيا ورا هادشي كامل، مراقبة الوضع، وبعدما حسات بالشوهة لكبيرة لي وقع فيها وفد البوليساريو، صيفطو فيدور ديال الوفد الجزائري وهجم على البطل المغربي، لي فرش فضيحتهم.
عضو المغربي كتحسب ليه، مراقبة الوفد ديال البوليساريو لي كان مندس وكيسمع تعليمات الوفد الجزائري، وتمكن من أنو يفرشهم ويفضح ألاعيبهم قدام العالم، وخا تعرض لهجوم من طرف عضو المخابرات الجزائرية، ولكن خرج منها منتاصر لبلادو.
هادشي لي وقع غاتكون عندو تأثيرات كبيرة فقادم الأيام، حيث يوم ورا يوم كتبان ممارسات خبيثة كتخطط ليها الجزائر وتقوم بتنفيذها البوليساريو، غير بحال هاد العضو لي كان ضمن الوفد المغربي كتحسب ليه الفطنة ديالو، لي تمكن بوحدو من إفشال مخطط مدروس من كرف المخابرات الجزائرية بقمة تيكاد فاليابان.
