كود هناء ابو علي كازا ///
المنتج العالمي ريدوان ظلم المرأة فالعالم وطبعا فالمغرب باش رجع مدان فقضية اغتصاب وعندو اكثر من قضية سعد لمجرد للساحة. هادي 3 ايام طلق هاد المنتج اغنية بعنوان “تايم او افريكا” جمعات هادا المدان فقضايا اغتصاب مع انكوني وعطيف زيناشي. ريدوان اختار “الكان” والكورة باش يبيض تاريخ اكحل ديال هاد الشخص بداه فامريكا باش هرب منها وسالاه بالحبس فباريس وقضايا كثيرة وشهادات صادمة من بلادو وغيرها.
كيفاش منتج عالمي توصل بيه الوقاحة يرجع بحال هادا. كون دارها ريدوان فامريكا هو براسو ما يبقاش يقرب للانتاج. لكن فنان واحد، على الاقل، لانو هو اللي خرج وقالها، رفض اسمو يرتابط بمغتصب وهو الرابور الگراندي طوطو. فحوارو مع مومو على “هيت راديو” قال طوطو بالي كان فمشروع الالبوم هادا وباللي هدر مع المعنيين وبجات المفاوضات ومع مول لبروجي =ما قالش اسمو ولكن باينة ريدوان= وباللي بعد ما بقشش لقى مشاركة “واحد الفنان” =فاشارة لسعد لمجرد=.
طوطو اكد فحوارو باللي ما يقدرش اسمو يكون مرتبط بهاد الشخص وباللي هاد الشي عندو راه “قضية مبدأ” وباللي احترامو لامو ولاختو ولمراتو يخليه ما يكونش فمشروع فيه واحد =لمجرد= طبعا كيشير لادانتو فقضايا اغتصاب
طبعا هدر على الفنانة للي شاركو وقال باللي ما باغي يقلل احترامو حتى من واحد خصوصا اللي شاركو فهاد المشروع ولكن هو رفض المشاركة
برافو على طوطو فهاد الموقف. كان خاص كلشي يكون عندو نفس الموقف. راه فضيحة كبيرة يكون فاغنية ماما افريكا ومعاه لبنات.