واش مصلحة الطّفل كايحددوها العراوي د الراجل ؟ كيفاش فنانة كبيرة و امرأة ذكية و أم صالحة فحال جميلة الهوني و فحال بزاف د المغربيات مطلقات تبقى تحت السبّاط د الطليق ديالها هوا الوحيد لّي عندو الولاية الشرعية و هوا الوحيد لي يقدر يقرر فأمور خاصة بالطفل فحال السفر و الانتقال المدرسي ؟ آش هاد القوانين القندهارية !

سهام البارودي- كود//

مؤخرا شفت الڤيديو د جميلة الهوني لي كاتعاود فيه على المعاناة ديالها كأم مطلقة كاتشوف راسها محرومة من اتخاذ قرارات مهمة فحياة ولدها فحال السفر و الانتقال المدرسي علاش ؟ حيت فالمغرب واخا گاع الحوايج الزوينين لي جابتهم مدونة الاسرة مازال كاين اجحاف كبير فحق المرأة و الوصاية الشرعية كاتبقى عند الأب بوحدو ! هوا لي يقدر يقرر بوحدو فأمور كاتخص الاطفال ديالو فحال السفر و الانتقال المدرسي مثلا.

الأم المطلقة فالمغرب واخا هي لي كاتعيش فأغلب الحالات مع الدراري و كاتقابلهم و تكلف بيهم، ماعندهاش الحق تقرر فحياة ولادها، واش ماشي الظلم هذا ؟

باشمن حق الاب بوحدو لي تكون عندو هاد الوصاية ” الشرعية” ؟ واش غي حيت عندو العراوي صافي راه عندو الحق ! يعني راجل ديميسيونير مطلق المرا سامح فالاولاد ، ماباغيش يخلص النفقة كايتهرب من مسؤوليتو كأب عندو الحق أنه يقرر فانتقال مدرسي د ولدو و الأم لي معاها داك الطفل بالليل و بالنهار ماعندها فيه حتى حق ! كاتعتابر أم حاضنة ! فحالا شاريها داك الراجل باش تقابل ليه ولدو ! ولدو بوحدو طبعا حيت هوا بوحدو لي من حقو ياخد قرارات فحياة داك الطفل! فحالا المرأة غير صالحة لاتخاد قرارات ! مكلخة و لا متخلفة عقليا ؟ صالحة غي لتبدال ليكوش و الطياب

الى ماكانش هذا هوا التخلف و الظلم فا اشنو هوا التخلف و الظلم ؟

هاد القانون القروسطي خاصو يتبدل اليوم قبل غدّا ! آشمن وصاية شرعية و لا الملاوي واش حنا عايشين فالقرن جوج ؟! آ سيدي عطيو للعيالات الحاضنات يقرروا فمصير ولادهم ! شحال من وحدة اليوم كاتخضع للابتزاز من الطليق باش يسني ليها انتقال مدرسي و لا رخصة للسفر ؟!

خاص مراعاة مصلحة الطفل ! و مراعاة الدور الكبير لي كاتلعبو المرأة فحماية ديك المصلحة ! راحنا عارفين خروب بلادنا ! و عارفين مورا الطلاق شكون كايبقا حاصل فالاولاد و شكون كايعلّق !

إقرأ الخبر من مصدره