كيفاش عندنا مخرجين مزيانين والرياضية كدير داك النقل اللي كيكرهك فالكورة. كانو يجيبو هشام عبد الرحيم مخرج الحمرا والخضرا فكأس العرب. خبير لـ”كود”: ماشي مشكلة امكانيات ولكن ادارة هاد الامكانيات

علي الصافي كود كازا //

يوم افتتاح مونديال الاندية بطنجة كان الافتتاح مقاد. كان يدار حسن كون المشرفين الفرنسيين على اعدادو خداو وقت اطول من قل من جوج سيمانات. لكن اللي بان ضعيف هي قناة “الرياضية”. طريقة النقل واخا بدرون بسيطة بزاف والاستوديو التحليلي والتغطية باهتة.

لمغاربة تقلقو وبان هاد الشي فوسائل التواصل الاجتماعي. سبو “الرياضية”. ما عجباتهمش النشوفية لا ديال التحليل ولا ديال النقل.

طبعا كلشي رجع يتفكر كيفاش راطات هاد القناة نقل عودة المنتخب المغربي من قطر والاستقبال اللي دار ليه فالرباط.

لكن واش المشكلة فالتقنيين ولا فالقناة ولا فالمغاربة اللي كيبانو ضعاف فهاد الجانب ولا فالامكانيات؟ خبير فالتلفزيون قال ل”كود” باللي المشكلة هي “ادارة الامكانيات” ومشكلة “خبرة” بكون شي مخرجين ما كيقراوش ما كيطوروش ريوسهم. كاين اللي غير حتى جا وولى مخرج. تعطيه حدث كبير غادي يرجعو صغير”.

لكن علاش مخرج مغربي اسمو هشام عبد الرحيم كيخدم ف”ميدي 1 تي في” مع فرقتو المغربية المائة بالمائة دار اخراج واعر فالديربي التاريخي عن كأس العرب بين الوداد والرجاء. اللي سالى فاللول بواحد لواحد وفالثاني ب4ل4 وتأهلات الخضرا.

لمغاربة كيعقلو على هاد الماتش كيفاش خدمات قناة ابو ظبي ووجدات للمغاربة الظروف المهنية واعتمدات على هشام عبد الرحيم باش يدير خدمة تورخات.

حسب الخبير اللي هدرات معاه “كود” باللي كلشي على المخرج. على مهنيتو. على شخصيتو ولكن هاد الشي ما كافيش بلا توفير الامكانيات. الخبير اكد ل”كود” باللي ديك الامكانيات اللي خدم بيها المخرج فماتش الرجاء والوداد راها متوفرة عند “الرياضية”، واضاف “اللي يقدر يكون فايت هي خاص التقنيين يكونو مخلصين مزيان. يكونو فرحانين بخدمتهم ماشي جايين يديرو بريكول. يكون اللي كيديرهم كيفهم مزيان وعندو شخصية ويوجد ليهم كلشي”

وهدر الخبير على نقطة منتاشرة فالمغرب وهي شي تقنيين كيبغيو التدويرة باش يديرو خدمتهم. هنا وضح باللي مثلا “الرياضية” تخلصات مزيان باش تكلف بالموندياليطو٬ وهي اللي خاصها تعطي تعويض لهاد التقنيين ايلى دارو خدمتهم مزيان

إقرأ الخبر من مصدره