كود سبور//
غيسافر الرجاء الرياضي اليوم الأربعاء إلى تنزانيا باش يلعب مع فريق سيمبا التنزاني فالجولة الثانية من ليكروب ديال عصبة أبطال إفريقيا، وسط إستياء ديال عدد من مكونات النادي بسبب هاد الرحلة الشاقة والعواقب ديالها على نتائج الفريق فهاد الموسم.
وحسب مصدر مطلع فعدد من المنخرطين فالرجاء ما عجبهومش طريقة تدبير رئيس النادي عزيز البدراوي لرحلة الفريق، والعجز ديالو على توفير طائرة خاصة تنقل الخضرا مباشرة من المغرب إلى تنزانيا فبصلات ما يمشي الفريق مسخسخ حتى الخليج عاد يرجع يشد الطريق مرة أخرى لتنزاتيا وهادشي فالألي والروتور.
مجموعة من المنخرطين ديال الرجاء وملي عرفو أن الفريق غيمشي فرحلة غير مباشرة وشاقة فيها ساعات من الطيران وساعات ديال الانتظار بالمطارات، تقلقو بزاف وغاضبين من البدراوي وأكدوا أنه كان بامكانو يطلب المساعدة ديالهم ملي عرف راسو ما يقدرش يوفر ثمن كراء طائرة وهم يتكلفو ويسعادو فريقهم، وراه سبق لهم وقاموا بنفس الامر مع المكاتب السابقة ملي كانوا كيحتاجو مساعدة فهاد الإطار باش تكون الظروف مواتية للفريق.
وكتعرف صفوف الرجاويين تخوف كبير من رحلة الفريق الأخضر إلى تنزانيا حيث رحلة شاقة، وتقدر تهدد استقرار الفريق على مستوى النتائج والمنافسة ديالو ألقاب هذا الموسم، حيث ماشي ساهل على اللاعبين يدوزو من اليوم الأربعاء حتى الاثنين المقبل فالسفر بين بلدان بعيدة ويتسناو بالمطارات ويلعبو ماتش ضد سيمبا التنزاني فالعصبة، ويرجعو للمغرب ويلعبو من بعدها بيومين ماتش فالبطولة ضد إتحاد التواركة.
Laisser un commentaire