سهام البارودي-كود//
الاغلبية د العيالات فاش كايطلقو بالدراري كاتشدهم و تبقا حاضنة عليهم بوحدها ! كاتولي منها أم و أب، لاهضرتي معاها كاتقوليك انا مابقيت بغيت والو ! نقابل غا وليداتي و صافي! فحالا هي ماعندها حياة ماعندها حق فأنها تعاود تبني حياتها مع راجل آخر و بزاف بزاف د العيالات كايطلقو صغارات و زوينات و كايبقاو مسجونين فحياتهم مع الاولاد ! فحالا صافي تجوجات مرة وحدة و دوزات الفريضة الله يجعل البركة دابا تشد لارض و تفني حياتها على ولادها ! وكاين گاع لي كايفتاخر بهادشي!
و الأب فهاد الفيلم ؟ الأب من الطلاق كاينسى شي حاجة سميتها الاولاد و كايمشي يعاود حياتو مع راساتو ! يشبع صحابات و فاش يطيب يضربها بشي تجويجة و يعاود يطلع فالعمارية و يبني حياتو من جديد مع زوجة جديدة و اولاد جداد ! و بزاف فيهم كاينسى ولادو ! كايطلق المرا و يطلق معاها الولاد و النفقة ديالهم !
هادشي ماخاصوش يكون ! خاص المرا فاش طلّق تعطي للراجل ولادو و تسيفطهم عندو و تخليهم ليه يشدهم تاهوا و يدوز معاهم الوقت و يغسل ليهم و يقرا معاهم و يعاونهم و يعطيهم من وقتو و طاقتو و حنانو يشبع منهم و يشبعو منو ! ماشي غير الام بوحدها لي خاصها تقابل دوك الاولاد !
تخليهم ليه يدوزو نص الوقت عندها نص الوقت عندو لاكانو فمدينة وحدة ! و لاكانو فمدن مختلفة الويكاند و العطل يدوزوهم عندو ! باش تاهي يبقا ليها الوقت باش تعاود حياتها و تكون عندها حياة عاطفية و جنسية سوية و لابغات تزوج تعاود تزوج ماشي تبقا مسجونة فحياتها ديال المرا المطلقة لي خاصها تعيش غا لولادها و تنسى راسها فحالا هي ماشي بنادم من لحم و دم و احساس !
و هادشي طبعا غايعود بالخير على دوك الاولاد لي غايحسو بلي الام ديالهم ناشطة و سعيدة و عندها حياة متوازنة ماشي مطلقة كئيبة و معصبة لي دوا فيهم تنوض ليه تسلخو !
Laisser un commentaire