سهام البارودي – كود//
بزاف د الفنانة عندنا مكلخين بزّاف ! دابا كون كانت شي تهمة سميتها ” الاشادة بالاغتصاب” فحال “الاشادة بالارهاب” كورّا النص ديال الفنانة باتو فالحبس نهار الجمعة! و أولهم رشيد الوالي و دنيا بطمة! لي قالّيك متضامنين مع سعد المجرد ! وا شوف هاد الناس لي كايتضامنو مع المغتصبين و المجرمين!
ايه سعد المجرد فنان مغربي و من بعد؟ لا الفن ديالو و لا تامغربيت ديالو و لا الزَين ديالو والا المسار الفني د واليديه ماكايشفع ليه فهاد المصيبة لي دار! يتكرفص على بنات الناس ! راه جريمة هادي !
بلا دوك الجرائد الالكترونية لي كادور فجناب حومة المجرد تسول العساس و الگارديان و مولات المسمن و الخياطة د مت سعد المجرد كي داير التعامل ديالو ؟ مزيان الله يعمرها دار ! و كي دايرين واليديه ! واليديه دراوش الله يعمرها دار !و كي تلقيتي الخبر ديال الحكم عليه بست سنين ؟ ! بقا فينا بزاف و الله ! مايديرهاش!
فحالا زعما غا حيت الله يعمرها دار و كايدوز يقول السلام للعساس و كايدور مرة مرة مع الگارديان راه مايمكنش يغتاصب وحدة ! زعما باش يكون مغتصب و يتضرب بست سنين خاصو يكون كايتمشى و جابد حجرو فالزنقة كايغوت “آ مولا نوبة “! فحال الكواي لي كايعيط ” آ لي عندها شي مقراج للكوا” ! سّي العساس سمح لينا بالزربة نتا آخر واحد نسمعو ليه فواقعة الاغتصاب ! خاصنا نسمعو للتيتيزات لي خرجو معاه و لي شطحو معاه فالكليبات ديالو و لي سهرو معاه هوما لي يقدرو يعطيونا مايفيد ! و فالعالم د هاد التيتيزات الهضرة دايرة و رايجة على انه السيد كايعجبو التجنديخ !
و بالرغم من انه هادي ماشي أول مرة و لكن شي المغاربة مجموع فيهم واحد الميلونج ديال الكالاخ و النية و العاطفة كوكطيل مولوطوڤ كايتخايلو المجرم بواحد الصورة نمطية بسيطة، خاصو يكون مضروب فوجهو و سنانو مخصرين و قبيح و كايسب عاد باش يتسمى مجرم بالرغم من أنه اعتى المجرمين المغتصبين و القتلة المتسلسلين فالعالم راه كانو فيهم مهندسين و اطباء و ناس كايبانو “بعقلهم ” و “مايديروهاش” !
مع كامل الأسف ! قادوس ديال الميزوجينية و الحگرة و احتقار المرأة و جسد المرأة تفرگع علينا الجمعة ! كاتبقى تشوف كاتقول مازال بزاف بزاف د الوقت خاص المغاربة باش يفهمو بأنه الاغتصاب راه جريمة “دبصح” ماشي دبلعاني !و بلي لي كايرتاكبها مجرم لا يستحق الشفقة !
Laisser un commentaire