الرجاء ربحو المحمدية وحلم أيت منا يتغلب على الخضرا فدونور تأجل عاود ثاني

كود سبور//

حقق الرجاء الرياضي رباح مهم اليوم السبت فالدوري الإحترافي المغربي لكرة القدم، من بعدما فاز على الضيف ديالو شباب المحمدية بستاد دونور برسم الدورة 19.

وسالا الماتش ما بين الرجاء الرياضي وشباب المحمدية بنتيجة 1 لزيرو لمصلحة الفريق الأخضر، وانتظروا الرجاويين الشوط الثاني من الماتش باش يماركيو الهدف الأول واللي سجلو نوفل الزرهوني فالدقيقة 50، وكانوا الرجاء يقدروا يزيدوا أهداف أخرى فالماتش ولكن الزربة وقلة التركيز عند اللاعبين ديال الخضرا خلاهم يضيعوا فرص كثيرة مقابل هجمات قليلة بزاف ومحتشمة ديال المحمدية اللي رجعوا إلى الوراء وبقاو كيتفرجوا فالرجاويين وهم كيضوروا فكرة فيما بينهم، قبل ما يماركي البديل سفيان بنجديدة الهدف الثاني للخضرا فالدقيقة 90 ولكن تم الإلغاء ديالو من طرف الحكم سمير الجولة.

الرجاء الرياضي بهذا الرباح رفع رصيدو إلى 33 نقطة وظل مع رباعي مقدمة الترتيب على بعد 10 نقاط من الصدارة، أما شباب المحمدية فبقات عندهم 23 نقطة، وظلوا فالمركز 10، وبهذه الخسارة تبخر كذلك حلم رئيس شركة SCCM هشام أيت منا مرة أخرى بالفوز على الرجاء فدونور حيث سبق له وصرح أنه ملي طلع رئيس للشباب وهو كيحلم يربح الخضرا ولكن هذا الحلم تأجل ثاني.

إقرأ الخبر من مصدره