وكالات//
قدر تطبيق “التيك توك” الشينوي يكون أكثر تطبيق تيليشارجاوه الناس في 2022، وفات تطبيق الفيسبوك والأنستكَرام، وفات حتى اليوتوب باعتبارو أكثر تطبيق كتدخل ليه الناس في العالم.
وقدر تطبيق التيك توك أنه يخلي الشركات الميريكانية لي كاين المقر ديالها في السيليكون فالي أنها تدق ناقوس الخطر بسبب هيمنة هاد التطبيق ديال الشينوا لي عندها عداوة سياسية تاريخية مع ميريكان.
حتى السياسيين في ميريكان خلعتهم الأرقام ديال تفوق التيك توك، خصوصا أن الانتخابات ديال النصف قربات وميريكان خايفة تستعمل الصين الخواريزميات باش تأثر على الناس لي غادي يصوتو.
الهيمنة ديال التيك توك في العالم بدات في 2018 ولكن ميريكان ما كانتش متوقعة أنه غادي يفوت التطبيقات لي كتسيرها شركات ميريكانية خصوصا الفيسبوك لي كتستغلو في الترويج لسياستها.
القوة ديال التيك توك على حسب ما رصدو جورنال غارديان هو أنه نصف الميريكانيين لي عندهم بين 18 و30 عام كيستخدموه، وهادشي لي خايفة منو ميريكان لأن هاد الفئة ساهل تأثر عليها.