محمد سقراط-كود///
أنك تسمع بدعوة لمسيرة ضد الغلاء في فايسبوك أو في الواتساب هادي حاجة طبيعية وصحية وفايتة وقعات ونجحات، ولكن أنك تسمع أن الدعوة جايا من إنستغرام من عند صحابات قويلبات تكبير المؤخرة وتضخيم الصدر، ومؤثرات لي عايشات فابور بالإشهار، ومن المشاهير واللعابة والناس المرفحين لي كيتباهاو عبر تصاورهم بنمط العيش ديالهم المكلف وبالسفريات وزيارة أرقى الفنادق والمطاعم، وتلقى هادو هوما لي باديين حملة ضد الغلاء فهنا أي واحد غادي يدخلوا الشك، على فوقاش كانوا هادوا أصلا مسوقين لشي سياسة ولا مجتمع ولا بلاد، حتى بين ليلة ونهار ولاو كيوجهوا خطاب للملك ديريكت يتدخل باش ينقص من ثمن البيض والمواد الغذائية ويوقف هاد الزيادة لي فشلات الحكومة في التصدي ليها وكيهدرو بحال الى صافي بداو الناس كيموتوا بالجوع، وهوما واخا لاباس عليهم ولكن حبهم وارتبلاطهم بالمغرب خلاهم يكونوا صوت الشعب وسط تصاور المؤخرات.
التضخم والغلاء راه موشكيل عالمي وأسبابو متعددة، وفاش كيبداو يغلاو الحاجات حتى هاديك لي مغلاتش كيزيد فيها مولاها باش ماتبقاش إستثناء، بنادم كتلقى عندو شي مسمار من التسعينات وكيقوليك زادو فيه راك عارف الطرونسبور والحرب وكولشي تزاد، وطبعا المدن الكبيرة بالخصوص الحياة ولات فيها غالية وصعيبة بحال طنجة الرباط كازا قنيطرة حتى هي، هادو مدن غلاو بلا قياس بالحرب أو بلاش، لذا فراه المكان الأنسب أننا نسمعوا إحتجاحات ضد الغلاء أو مسيرات راه هو تخرج من هاد المدن ماشي من إنستغرام، الموقف السياسي الوحيد لي يقدر يعبر عليه الواحد في إنستغرام هو يجي في صف دنيا باطمة أو راجلها ويعطي رأيه في صراع الشطاحة مايا مع شي وحدة شتها كتبكي على ولادها وكتقول بلي مايا غادي تفرقها على راجلها.
إنستغرام بلاصة ديال المعاطية بين دونيا باطمة وراجلها وبين الشطاحة مايا وصوفيا طالوني ماشي بلاصة محاربة الغلاء وهاد الحملة لي فيها المؤثرات والمؤثرين المرفحين كيتباهاو بحياتهم اللوكس حتى شوية بغاو يتوسطوا بين الشعب والملك باش يتدخل يدير حل للغلاء راه ما مبنياش على منطق وفيها بزاف ديال التخوفيش زيدها على حملة المقاطعة السابقة لي كانت غير منطقية وموجهة، فايسبوك حائط مبكى من نهار بان حتى لدابا فيه بنادم كيتشكى من الغلاء ويتذمر ويسخط ويسب ويناقس السياسة، إنستغرام بلاصة ديال العرض لي عندو شي حاجة عارضها تما موريها للعالمين ماشي بلاصة منين غادي يخرج شي حراك شعبي ضد الغلاء، حتى هادو لي نوضوا القورع لضريب الحجر موحال عندهم النيش مزيان.