وكالات //
شركة “ميتا” لي عندها فيسبوك وإنستغرام وواتساب، سيفطات لبارح الأربعاء 11 ألف موظف خدامين معاها من العالم كامل، وقالت بأنها كتسعى باش تقلص النفقات ديالها في المرحلة المقبلة.
مارك زوكربيرغ قال في رسالة أنه غادي يتحمل المسؤولية ديال هاد القرار لي خدا ولي هو صعيب للشركة وللناس لي تخلات عليهم، ولكن ما كانش بديل آخر، وفي نفس الرسالة اعتذر من الناس لي تم تسريحهم.
هاد التسريح ديال الموظفين لي كيتعتبر الأكبر في تاريخ شركة “ميتا” من نهار بدا الفيسبوك كيمثل 13% ديال الموظفين في الشركة.
وماشي غير هادي، شركة ميتا غادي تجمد التوظيف في الربع الأول من العام الجاي بسبب الأزمة الاقتصادية لي ضاربة الشركة.
هاد الخطوة لي خدا فيسبوك جات في وقت تراجعات فيه الأرباح الصافية ديال مجموعة “ميتا” لـ4,4 ملايير دولار في الفصل الثالث من 2022.