سهام البارودي ـ كود//
مغربيات بزاف كايعانيو من الزيادة فالوزن ونسبة كبيرة فيهم مراض بالسمنة وهادشي كاتشوفو فين مامشيتي، فالشارع فالطوبيس فالتران، الأغلبية د العيالات غلاضات وكايخبيو الغلض ديالهم وسط الجلالب والعبايات واللباس الفضفاض. وهاد الظاهرة ديال السمنة كاتلقاها خصوصا فالأوساط المقودة عليها كلما زاد الفقر زادت السمنة !
والمشكل أن الغلض ولا تراند دابا حتى عند الشابات المغربيات، بنات صغارات فالسن وباغين يربيو الترمة والبزازل والفخاض داكشي علاش كايتعاطاو للحسة والتحاميل والگديرة! كلشي باغي يكبر الترمة !
هادشي علاش عجبني الحال فاش مشيت نتريني فواحد لاصال ديك النهار ولقيتها عامرة بالبنات، فرحت أولا حيت الرياضة مهمة للمرا، وحيت خاصها تتهلا فصحتها وتقوي الجسم ديالها باش ملي تكبر ماتشكرشفش فحال جداها ومها وخوالاتها وتبدا تشكى من الركابي والظهر والسكر والملحة والطونسيو والأمراض المرتبطة بالسمنة! البنات لي كايترينيو اليوم راه أكيد غايشرفو بطريقة أحسن من هادوك لي عاطينها للمرقة والسداري والنعاس!
وفرحت ثانيا حيت البنات زاحمو الرجال ففضاء كان مخصص ليهم منذ سنوات وولينا كانشوفو بنات كايترينيو الميسكيلاسيون وكايشاركو فحصص الكروس فيت، عوض أنه شحال هادي كانت الرياضة دالبنات منحصرة فلايروبيك والسالسا وشي حصص بسيطة وهادشي لاكانت كادير شي رياضة، حيت أصلا قلال المغربيات لي كايمارسو الرياضة !
وفرحت ثالتا فاش شفت بنات كايترينيو بلي براسيير! يعني مامضطرينش يلبسو الطويل ولا السترة ولا ديك الهضرة د البز! بنيات لابسين براسييرات ديالهم وكايترينيو في جو ديال الروح الرياضية وسط الدراري والرجال واللحايا وكلشي داخل سوق راسو.
الله على منظر شحال زوين !
البنات فلاصال تحت شعار الصحة والحرية مايمكن تكون إلا حاجة زوينة للمرا فهاد البلاد عوض أننا نبقاو نتوارثو أجيال ديال العيالات الغلاضات المترتشات المريضات المهلوكات، ونسمعو ديما أغاني شعبية تتغني على الأم المريضة لي كاتموت ومابغيت فلوس مابغيت دنيا بغيت مي تبقا عايشة ليا ونوليو نسمعو أغاني شعبية على الأم لي خادمة البرا والضورسو مزيان، على الأم المغربية القوية، لي بصحة جيدة وقادرة تدافع على راسها وتسلخ شي واحد لابغا يتعدى عليها، الأم المغربية لي كاتمارس الرياضة مع ولادها وكاتحل ليهم عينيهم على مبادئ الأكل السليم والعيش الصحّي بعيدا عن ثقافة الخبز والمرقة والسداري!
