سهام البارودي- كود//
مهرجان السينيما الى تنظم فميريكان جات معاهم ! راه ميريكان هاديك، هووليود، بلاد السينيما و الفن و الروائع لي شافها العالم كامل، تنظم فإيران جات معاهم كاينة شي حاجة سميتها السينيما الايرانية كلشي كايعرفها، الهند آ سيدي جات معاهم بوليود هاديك قادرين ينتجو ليك ميات فيلم فالنهار كل فيلم فيه ثلاتة د السوايع، مصر جات معاهم فنانين كبار و بلاد عطات و مازال كاتعطي فالسينيما … شفتي نيجيريا تقدر تنظم مهرجان د السينيما و تجي معاها حيت سينيما “نووليوود” مغرقة السوق الافريقية و كاتنافس بوليوود !
و لكن حنا! حنا لاّا ! ماجاتش معانا ننظمو مهرجان كبير للسينيما و حنا ماعندناش السينيما ! المغرب كبلاد مامعروفش بالسينيما ديالو ! و حتى السينيمات براسهم ماعندهاش ! علاش غانظمو حدث كبير و نخسرو فيه الفلوس و نجيبو ليه النجوم من العالم كامل ؟! دوك النجوم براسهم لي تاواحد فيهم ماكاتلقاه فايت مفرج فشي فيلم مغربي !
ماعندناش السينيما و حتى داك الشويييييكيك د السينيما لي عندنا مايستاهلش ننظمو عليه مهرجان كبييير و نسميوه المهرجان الدولي و نخسرو فيه بزاف د الفلوس ! ماعندناش السينيما خاصنا نقولوها و نعرفوها و نرضاو بيها صافي اكثر من ستين عام باش المغرب شد الاستقلال ! اكثر من ستين عام ماقدرناش نطورو فيها صناعة سينيمائية كبيرة ! صافي الله يجعل البركة لي كلا حقو يضم عقلو ! ماشي ضروري نتعلقو فين نتفلقو و ندفعو الجبهة ! ماعندناش السينيما ماشي نهاية العالم ! راه عندنا حوايج اخرين يمكن نثمنوهم و نديرو ليهم مهرجانات … عندنا الموسيقى مثلا، الراب و البوب و الابداع ديال الجيل الجديد د الفنانة المغاربة وي ! هادشي يستاهل الى دار عليه مهرجان و لكن السينيما ؟ السينيما آ صاحبي و نتا عدد السينيمات عندك فالبلاد كاملة تحسبهم بصباع يد وحدة !
راه فحال لا قلتي الاسكيمو كاينظمو مهرجان گناوة فالقطب الشمالي و لا قبائل الماساي فكينيا كاينظمو مهرجان د الميطال ! لا علاقة ! لا علاقة ! غا مزاحمين مع كان بزز و صافي!