كود هناء ابو علي ///
البارح خرج خبار باللي وزارة التعليم العالي والبحث العلمي والابتكار باغية تركب على قضية استاذ رفض يبرك فبلاصتو فرحلة من لاس بالماس لكازا لخميس اللي فات 11 ماي 2023 وجاب ليه البيلوط الامن باش يهبطو وضامنو معاه صحابو كانو فشي رحلة تماك.
الوزارة كيف كشفات “كود” غادية دخل بعد ما طالعات على رواية اخرى كانت “كود” اول من نشرها. المشكلة هي اش حرگ شطاطة وزارة التعليم العالي. اش دخلها. تديها فامور كبيرة كتهمها. الوزيرعبد اللطيف الميراوي يديها فخدمتو راه عندو قضايا مازال تابعاه. شي نهار نمسعو باللي فضيافة الشرطة القضائية على قضايا دازت باش كان على رأس جامعة القاضي عياض بمراكش.
دابا نرجعو لهاد الحادثة الغريبة فعلا. كيفاش فئة مثقفة بحال الاساتذة الجامعيين توصل بيهم الدرجة باش يركبو فطيارة بحال ايلى راكبين فكار عريبات. اه خاوية نركب فين بغيت. واش هادو بصاح كيقريو فالجامعة. واش بصاح باحثين فهاد لبلاد.
راه اللي داروه خطير بزاف. واخا تكون بوحدك فالطيارة٬ خاصك تبرك فبلاصتك حتى تطلع الطيارة وديك الساعة ممكن تطلب المضيفة او المضيف ولا قبل بدل لبلاصة ولا ما بغاش بقى فبلاصتك. بوحدك ماشي معاك الناس. باش كتطلع للطيارة البيلوط هو كلشي. ينزلك يخليك. هو القاضي هو الرئيس هو كلشي. يعني باش توصل ليه ما بقى كلام.
كيفاش هادو فئة متنورة فالبلاد تتصرف بحال هاد الشي. اكثر من ذلك تخرج تعطي روايات فيها نقص بزاف. مثلا ما قالوش لينا هاد الاساتذة =هو فالحقيقة كاين غير واحد ولخراين ضامنو معاهم= شكون خلص لوطيل عليهم باش بقاو تماك. ايلى كانت لارام ومضاربين مع بيلوط لارام راه مشكل اخر يا مثقفي لبلاد.
باش كتشوف تصرفاتهم وتشوف كيفاش كيتعاملو شي مواطنين فالطوبيسات والترانات كيبان ليه باللي قراوهم امثال اللي برك فبلاصة ماشي ديالو وحيح باش يبقي فهاديك لبلاصة وباش البيلوط طبق القانون بداو كيقولو اه جابو لينا لكوارديا سيفيل وحنا مغاربة ووو. شوفو فين وصلنا