كود سبور//
تفركع الدولي المغربي سامي مايي على الجامعة الملكية المغربية لكرة والناخب الوطني وليد الركراكي حيث ما عيطش عليه هو وخوه ريان مايي باش يشاركو مع المنتخب الوطني المغربي فكأس العالم فقطر.
وقال المدافع سامي مايي فحوار لموقع “dmsport”: “الصراحة تفاجأت أنا وخويا ريان ملي ماشفناش الأسماء ديالنا فلاليست، وماصدقناش هادشي ومفهمناش علاش حيث كنا عامين مع المنتخب وكنعطيو كاع اللي فجهدنا، وما عمرنا درنا شي مشكل وهادشي حطمنا”.
وزاد كمل سامي مايي وكيحس بلي هو خوه تظلمو وقال: “مشينا لعبنا مع المنتخب فبلدان فإفريقيا اللي عدد قليل من اللعابا اللي كيبغيو يلعبو فيها درنا اللي فجهدنا باش نشاركو فكأس العالم ولكن كتحس بالظلم ملي كتشوف هاذ تمارة كاملة ومانمشيوش، راه اختارينا المغرب اللي حيث كنبغيو بلادنا وباغيين نمثله ديما ماشي على قبل شي بطولة معينة”.
سامي مايي مقلق من الطريقة اللي تعاملت بها الجامعة الملكية المغربية لكرة والناخب الوطني وليد الركراكي معه هو خوه وقال: ” من بعد عامين ونص ديال الخدمة ما وصلنا حتى خبار، لا من المدرب ولا من الجامعة، ولا حتى تيليفون ولا غير يحترامونا، كنا باغين نعرفو غير علاش وقع هادشي غير يفسرو لنا شنو وكيفاش، واخا ما كنظنش بلي الأسباب رياضية، راه حتى حد ما يقدر يلومنا على شي حاجة حيث حنا اللعابا اللي لعبنا أكبر عدد من الماتشات من اللعابا اللي تختارو، كنا فحالة مزيانة، أمام إلى كانت شي أسباب اخرى فالاختيار ما كرهتش شي واحد فالمسؤولين يقولها لنا”.
الدولي المغربي باقي ما تقبل بلي ما غاديش يلعب هو خوه كوب ديموند وقال: “خدمنا باش نشاركو فالمونديال والمشاركة فكأس العالم تسلبات منا وتعطات لشي حد ما كيستحقهاش، وراني مازال مقتانع بلي الاختيار ماشي رياضي وأن كاينا شي حاجة ورا هاد لبلان”.
للإشارة فكل من الخوت سامي مايي المدافع وريان مايي والمهاجم فضلو يلعبو مع المنتخب الوطني المغربي على المنتخب الكاميروني البلجيكي، مع العلم أن بجوج بهم من أم مغربية واب كاميروني وتزادو فبلجيكا.
