كود سبور//
حقق الرجاء الرياضي رباح جديد فمنافسات عصبة أبطال إفريقيا لكرة القدم، خلاه يتصدر لكروب 3 وهو مرتاح ويقرب من التأهل لربع نهائي المسابقة، من بعدما ربح اليوم السبت فريق حوريا كوناكري الغيني.
الماتش اللي تلعب هاد العشية فستاد دونور بكازا، قدر يربحو فريق الرجاء الرياضي بنتيجة هدفين لزيرو على حساب حوريا كوناكري الغيني، وهو الهدف اللي ماركاه الهداف ديال الخضرا حمزة خابا فالدقيقة 43، أما الهدف الثاني ماركاه للخضرا اللاعب نوفل الزرهوني فالدقيقة 89.
الرباح ديال الرجاء الرياضي اليوم مكن الفريق أنه يزكي صدارتو للكروب 3 برصيد 9 النقاط ويقرب من حسم التأهل للربع النهائي، بفارق 5 النقاط على حوريا كوناكري الغيني الثاني برصيد 4 النقاط، وكيجي سيمبا التنزاني هو الثالث وعندو 3 النقاط، والمركز الأخير فيه فايبرس الاوغندي اللي عندو نقطة واحدة.
